27. 6. 2023: По майже роцї одкрыли зреконштруовану вежу на Дуклї

По майже рочній реконштрукції в понедїлёк, 26-го юна 2023-го року, одкрыли выглядкову вежу на Дуклї. Інформовала о тім аґентура TASR.

Окремы роботы, котры были частёв другой етапы, были заміряны на комплексну обнову і модернізацію їй выглядковых купол, вєдно з выглядковов терасов, котра находить ся на стрісі спіднёй куполы.

Познакомити і молодых з історіёв

„Мож повісти, же днесь одкрываме выглядкову вежу на 90 процент докінчену і што до єкспозічной части про навщівників. Вежу, котра собі заслужыть вызерати як у 21-ім столїтю, і думам, же нелем выгляд, але головно едукатівный розмір, інформаційно-комунікачны технолоґії і далшы річі, котры сьме ту выбудовали, суть на то, жебы молоды люде познакомили ся з войнами. З тым, што ту одбывало ся в двох світовых войнах,“ повів директор Воєньского історічного інштітуту Мілослав Чапловіч, котрый вірить, же вежу будуть навщівлёвати нелем домашнї, але і загранічны навщівници.

„Я барз радый і тїшу ся з того, як шумнї вызерать. То модерный културный центер, досправды модерна вежа, де люде можуть прийти за приємным зажытком, дізнати ся дашто о історії, а дакус і повзбудити, або освіжыти собі то, што ся учать в школї, може лем з книжок,“ доповнив міністер обраны Словацькой републікы Мартін Скленар.

Зробила ся друга з трёх етап, рахують з експозіціёв

„Проєкт быв барз файнї приготовленый паном директором і мене пересвідчів. Такой, кедь сьме ся односно того стрїтили першый раз, знав єм, же то будуть добрї інвестованы грошы,“ повів на марґо реконштрукції бывшый міністер обраны Ярослав Надь, за котрого міністрованя ся реконштрукція зачала реалізовати.

Головным цїлём обновы вежы, котру зачали влони в юли, было вырїшіня злого технічного ставу обидвох купол і терасы. В тых днях реалізують ся роботы повязаны з іншталаціёв першой части новой експозіції в інтерьєрї.

Перша етапа реконштрукції і модернізації вежы была зреалізована у 2021-ім роцї, цїлковы фінанції на тоту етапу были в сумі 200 тісяч евр. У 2022-ім роцї робили ся выглядковы куполы і тераса, як і стовп, а проінвестовало ся довєдна 1,2 міліона евр.

„Покля іде о комплетну експозіцію, затля сьме проінвестовали коло 80 тісяч евр, а іщі коло 40 тісяч проінвестуєме з тым, же то буде стала комплетна експозіція в трёх частях,“ доповнив Чапловіч.

Послїдню етапу реконштрукції і модернізації вежы, включно выбудованя сталой музейной експозіції у внутрїшнїй части, Воєньскый історічный інштітут планує в марцї 2024-го року. Роботы будуть дотуляти ся вонкашнёй фасады і модернізації інтерьєру приземной части вежы. В третїй етапі рахують з інвестіціёв приблизно 240 тісяч евр.

Петро МЕДВІДЬ, ЛЕМ.фм, языкова і ґрафічна управа: АРК в СР.