27. 7. 2022 На вікенд зындранівскє «Од Русаль до Яна»

Першый річник «Од Русаль до Яна» был зорґанізуваный в 1992 р. Уж в найблизшый вікенд Музей Лемківской Культуры в Зындрановій буде місцьом одбываня ся подіі «Од Русаль до Яна».

Подія повертат по долшій перерві, спричыненій не лем пандемійом, але і тым, што державны інституциі за остатні рокы не хотіли фінансувати орґанізациі зындранівскых стріч.

Свято з музиком, словом і артефактами

Так як бывало то в найліпшых роках орґанізуваной подіі, буде она тырвала два дни, од суботы до неділі (30.07-31.07). В проґрамі находит ся звиджаня музею, прелекциі, промоциі книжок, конкурсы і ремісничы показы.

Суботня част зачне ся о 16.00 год. Буде тіж част повязана з положыньом квітів. На обшыри Музею Лемківской Культуры находят ся памятникы мартиролоґіі лемківской нациі. То памятникы жертв лаґрів в Талергофі і Явожні, як і одкрыта перед пятьома роками на 70. річницю таблиця упамятняюча выгнаных з Лемковины в рамах Акциі «Вісла».

В суботній вечер на зындранівскій сцені буде мож видіти концерт Аґаты Рымарович з єй ансамбльом, а наконец добрі знану лемківску капелю Серенча з Ґорлиц.

Недільна част зачне ся о 11.00 год. Божеском Літургійом в поблизкій церкви св. Миколая. На 13.00 год. заплянуване є офіцияльне одкрытя свята, получене з привитаньом гостів і іх выступлінями. На подію запрошыня отримали м.ін. ведучы головных лемківскых орґанізаций, Андрий Копча (Стоваришыня Лемків) і Наталия Малецка-Новак (Стоваришыня «Руска Бурса» в Ґорлицях).

Недільна концертова част буде богатша як суботня, кєд же на сцені выступлят Свидницкы Геліґонкарі, Рымановяне, Ганця і Славко, Ославяны, Народна Музика Стропковяне, сестры Ковачовы і ґрупа Гудакы.

Місце з історийом

Першый річник «Од Русаль до Яна» был зорґанізуваный в 1992 р. Долголітнім орґанізатором подіі, на котру приходят Русины з обох сторін Капрат, был Федір Ґоч, єден з основателів Музею, пак його вельолітній опікун.

Неодолга потім, 1. червця/юнія 1995 р. офіцияльно зареґіструване было Товариство для Розвитку Музею Лемківской Культуры.

Початкы істнуваня Музею Лемківской Культуры в Зындрановій ідут од стрічы з 17. серпня/авґуста 1968 р. в Білянці. Там же прошла нарада при присутности лемківскых діячів. Были то Михал Доньскій, Михал Дзвінка, Федір Ґоч, Павел Стефановскій, Ярослав Трохановскій, Федір Кузяк та Леон Ґаль. Стріча закінчыла ся покликаньом до жытя Музейной Рады і Ізбы Памяток Лемківской Культуры в Зындрановій. Прото тіж офіцияльный початок музейной діяльности то 18. серпня/авґуста 1968 р. Музей початково фунґувал як Хыжа Памяток Лемківской Культуры.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)