27. 9. 2022: Здружіня і краї на выходї Словакії ся споїли за будованя автострады

Меморандом о сполупраці підписали в понедїлёк, 26-го септембра 2022-го року, обчаньскы здружіня Автосрада на Зепмлін (Diaľnica na Zemplín) і Наш Пряшів (Náš Prešov) з Кошыцькым самосправным краём і Пряшівскым самосправным краём.

Меморандум має служыти на коордінацію актівностей прямованых на выбудованя автострады D1 по граніцю з Українов, як і добудованя експресной драгы R4 по граніцю з Польщов. Аґентуру TASR о тім інформовав председа обчаньского здружіня Автострада на Земплін Петер Баторі.

Сполупраца дотулять ся і выпрацованя пропозіцій на леґіслатівны зміны підтримуючі процес приправ будованя інфраштруктуры драг. „Так хочеме одказати компетентным представителям нашой державы, же цїлый выход спаять ся, і же будеме довєдна боёвати за автострады на выход,“ повів Баторі.

І председа Кошыцького самосправного краю Растіслав Тырнка а підпредседа Пряшівского самосправного краю Йозеф Лукач при підписї меморандума в селї Калужа, Михалївского окресу, вказали на потребу спаяня актівістів і самосправ з цїлём добудованя хыбуючіх автострад і експресных драг на выходї.

На робочій стрїчі так само выменовали Раду самосправы при обчаньскім здружіню Автосртада на Земплін, котра буде новым порадным орґаном обчаньского здружіня. Членами рады стали пріматоры окресных міст і выбраны старостове сел з реґіону, котрого ся то дотулють. Мають повнити роль реґіоналных лідрів і забезпечіти тым лїпшу коордінацію роботы і актівностей напряменых ку будованю автострады на Земплін.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.