27. 9. 2022: Проґрам Театру Александра Духновіча в Пряшові на місяць октобер 2022
Приносиме вам проґрам Театру Александра Духновіча в Пряшові на місяць октобер 2022-го року:
5-го октобра 2022
На ревізію (Велика сцена, 19.00 год.)
Остра сатірічна комедія о жывотї і роботї сільского старосты і о тім, як рїшыв проблемы сільскых людей. В пєсї найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.
12-го октобра 2022
Червена калина (Велика сцена, 19.00 год.)
Темы любви і войны капчають ся в творах Василія Шукшіна в ґротесковім образї нашой добы, де главный герой Єґор глядать новый жывот як рецідівіста пропущеный з арешту. В тій драмазітації ёго траґікомічных повідань і новел крыє ся правда о індівідуалности вояка, котрый по войнї залучать ся до сільской соціеты. Червена калина – то сімбол грїху, од котрого Єґор буде пробовати очістити ся, і знова найти свою достойность.
21-го октобра 2022
Жобрацька опера (Велика сцена, 19.00 год., 1-ша премєра)
Жобрацька опера як комедія анґліцького драматурґа Джона Ґея была написана як пародія на великы оперы знаных театралных сцен, котра здобыла величезный успіх. В нашій інсценації ілуструєме оперету в середовиску злочінцїв як ундерґравндовый кабарет, де ся Мекіт званый Капітан, вождь банды бандітів, фраїркош, дістане до любовного трикутника.
26-го октобра 2022
Жобрацька опера (Велика сцена, 19.00 год., 2-га премєра)
Выступліня ТАД мімо Пряшів:
7-го октобра 2022
Зістали за дураків (Културный дім у Баєрівцях, 18.00 год.)
Україньскый комедіоґраф Марко Лукич Кропивницькый представлює ся в Театрї Александра Духновіча далшов комедіёв. 12 дївок на оддаваня, но жаден жених, холем не на першый погляд. Богатый млинарь Кукса і ёго сусїд, коваль Дранко, суть безнадійны в гляданю богатого мужа про своє велике потомство, но не знають, же жены ся о себе знають постарати самы, і поміч од отцїв їм нияк не треба.
23-го октобра 2022
Зістали за дураків (Културный дім у Літмановій, 16.00 год.)
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.