28. 10. 2022: Модернізация брунарской церкви і одкрытя давной поліхроміі

Вчас одкрытя бані на головній вежы вказали ся ориґінальны фраґменты старой довыселенчой поліхроміі.

Брунарска церков переходит модернізацию. Веденчы сут детальны баданя, котры вказуют на цікавы, незнаны дотля елементы.

Храм то єдна з найціннійшых памяток лемківской сакральной штукы. В 2013 р. был вписаный до Списку Світовой Спадковины UNESCO.

Модерны досліжыня і реконструкция

Як поінформувал Воєвідскій Уряд Охороны Забытків в Кракові – Делеґатура в Новым Санчы, якій одповідат за ремонтовы і консерваторскы працы памятковой церкви св. Михала в Брунарах, як раз перед парома днями зачали ся першы досліджыня.

То єден з найціннійшых обєктів на обшыри діянь новосандецкой делеґатуры. Модернізацийны роботы будут попереджены архітектонічныма баданями – буде зробленый інвентаризацийный сканінґ цілой церкви.

Што цікаве, консерваторы уж можут погородити ся першыма успіхами. Вчас одкрытя бані на головній вежы вказали ся ориґінальны фраґменты старой довыселенчой поліхроміі. Баня была долгы рокы вкрыта бляхом, што одріжняло ю од двох меньшых бань – над храмом вірных і святилищом. Цілю прац є привернути первістный выгляд верха церкви, в тым вкрыти бані ґонтом.

Фраґменты давной поліхроміі выявлены по знятю бляхы будут досліджены лябораторийні цілю окрислити склад субстанциі. Як інформує новосандецка делеґатура, уж тоты вступны результаты заповідают одкрытя цікавых і дотля незнаных елементів і деталів в тій памятковій лемківскій церкви. А дальшы досліджыня будут ведены вчас найблизшых прац.

Севериян КОСОВСКЫЙ, ЛЕМ.фм. фот. Воєвідскій Уряд Охороны Забытків в Кракові – Делеґатура в Новым Санчы / Facebook