28. 10. 2023: Влада одкликала уповномоченого про народностны меншыны

В середу, 25-го октобра 2023-го року, влада Словацькой републікы під веджінём премєра Роберта Фіца, котру в тот самый день выменовала презідентка Зузана Чапутова, одкликала на своїм першім засїданю уповномоченого влады Словацькой републікы про народностны меншыны Ласла Буковского.

Так само быв одкликаный уповномоченый влады Словацькой републікы про ромскы комуніты Ян Геро.

Ласло Буковскый быв у функції уповномоченого од апріля 2016-го року. У функції быв почас влад Роберта Фіца, Петра Пеллеґріні, Іґора Матовіча, Едуарда Геґера і Людовіта Одора. В часї, коли наступив за шефа Уряду уповномоченого влады СР про народностны меншыны, быв номінантом партії Most-Híd, котра втогды з Фіцовов партіёв Smer-SD, партіёв Sieť i націоналістічнов SNS творила владну коаліцію.

„Думам, же од 2016-го року єм успішно просаджовав інтересы меншын про захованя їх языка і ідентічности, а зато належыть подяковати каждому, хто дїлив і помагав наповняти мої візії о меншыновых правах,“ написав Буковскый на соціалній сітї.

„Затля не знаме, якы має нова влада планы в области просаджованя і послинїня прав меншын, но надїям ся, же не забуде на народностны меншыны, котры творять десять процент населїня, і буде брати до увагы їх шпеціфічны потребы. Желам собі, жебы меншыновы комуніты в новій владї нашли партнера, котрый буде отвореный і актівный в комунікації з меншынами,“ написав Буковскый.

Буковскый так само загнав писмо людям, з котрыма довгы рокы у функції сполупрацовав, наприклад членам Выбору про народностны меншыны і етнічны ґрупы. В нїм пише, же не думать, же то быв марный бой.

„Я пересвідченый, же за остатнї рокы ся мі подарило просадити много хосенных леґіслатівных і нелеґіслатівных змін. Была про мене честь з Вами спплупрацовати і творити лїпшы условія про меншынову політіку на Словакії. Тоты успіхы бы єм не знав досягнути без Вашой помочі, підпоры і спплупрацї.“

Петро МЕДВІДЬ, ЛЕМ.фм, языкова і ґрафічна управа: АРК в СР