28. 12. 2021: Евробанковкы з танками в Долинї смерти ся выпродали за два днї

Аж такый великый інтерес о евробанковку не чекали.

Компанія Euro Souvenir Slovensko у сполупраці із селом Кружлёва выдала тот рік сувенірову евробанковку, якой вартость є 0 евр, і на котрій суть выображены танкы в Долинї смерти.

З продаванём зачала Кружлёва 6-го децембра 2021-го року, но уж по двох днях были зберательскы евробанковкы выпроданы. Компанія выдала із „дукляньскых“ евробанковок 4000 фалатків, плус 1000 фалатків з придрукованым написом anniversary 2020.

На 0-евровім сувенірї є выдрукованый Памятник чехословацького армадного корпусу і сімболіка ТАРАН, што означує способ боя, кедь до себе наражають шыфы або іншы транспортны боёвы средства. На споминаній банковцї є танк Т-34/85 вклиненый до нїмецького танку Panzer IV Ausf. J.

Тот самый образ мож в реалности відїти і в Долинї смерти, де проходила Карпато-дукляньска операція. Друга сторона сувеніровой банковкы є така сама, яку мають вшыткы евробанковкы.

Продаваня зачало 6-го децембра рано, но уж почас попереднёго вікенду мав староста Кружлёвой Адріян Ґажо што робити, інформовали Піддукляньскы новинкы. Через вікенд подля новинок пришло старостови коло 70 імейлів і мав коло сто телефонатів. Вшыткых інтересовала евробанковка. Робітници сільского уряду мусили наконець такой по двох днях выбавити понад 2000 коперток із купленыма сувенірами.

Зберательскы евробанковкы ся продавали за три евра, але пізнїше ся звыкнуть продавати і за десяткы ці стовкы евр. Інтерес о „дукляньскы“ банковкы быв величезный, а не хотїли їх лем зберателї, але і люде зо села ці з піддукляньского реґіону.

Кружлёва довгодобо будує свій турістічный рух на пропаґації Карпато-дукляньской операції. Як повів староста Ґужо, по евробанковках мають і далшы планы.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.