28. 12. 2023: Проґрам Театру Александра Духновіча в Пряшові на місяць януар 2024
10-го януара 2024
„Бережіть Флорес“ (Велика сцена, 19.00 год., 1-ша премєра)
Як часто ся жена чує быти женов? Од чого залежыть чувство щастной і чарівной левітації? Твор Ніла Саймона занимать ся тыма в сучасности найважнїшыма вопросами. Тадь выважене взаємне дїяня сил їн і ян у козмосї є резултатом складной роботы над собов, над своёв особностёв, над своїм жывотом. І намагати мають ся так жены, як і хлопи, бо танґо танцюють у парї. Головна геройка знайде ся осамочена із своїм середнїм „неліквідным“ віком, і своїма свіжыма болістныма розходами. Здає ся, же жывот ся заставив, і вшыткы выроблены схемы комфортного єствованя згорїли в поломінях обставин. Могла бы ся зломити і зненавидїти свою судьбу. Лемже… судьба дарує женї три шалены приятелькы, і двох горячіх іспаньскых любителїв жывота. Як скінчіть тота iнтересна комедія, і ці научіть ся Флорес чути ся щастливым і чарівным квіточком, дізнаме ся по посмотрїню пєсы. Тото представлїня є скапчанём прекрасного гумору, невычерьпной мудрости бытя а любви до жывота і до себе. (Пєса є в україньскім языку.)
11-го януара 2024
Фараоны (Велика сцена, 19.00 год.)
Фунґованя колхозу, в котрім панують класічны стереотіпы о дїлїню роботы на хлопску і женьску, нарушыть єдного рана вість о вычеряню позіцій. Там, де стояли хлопи, будуть жены і наопак. Што ся стане, кедь хлопи-функціонарї, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.
17-го януара 2024
Вісем жен (Велика сцена, 19.00 год.)
Іщі все платить, же жены менше убивають, но о то веце докажуть до убийства привести? Роберт Томас прославив ся як майстер драматічных переломів: такой як думаме, же уж маєме ключ до вырїшіня детектівной історії, тот автор пересвідчіть нас, же ся мылиме, і же убийцём є хтось цалком іншый. Ёго пєсу Вісем жен мож принимати у веце аспектах: як напинаве детектівне повіданя, і як барз файну мозаіку людьскых характерів, але єднако і як пєсу, в котрій іронія, гумор і ґротесковы сітуації дають позерателёви розмір забавлїня.
18-го януара 2024
Головный тарабанщік (Велика сцена, 19.00 год.)
Пєсу Головный тарабанщік Александер Духновіч написав у 1852-ім роцї, но темы, котры в нїй одкрывать, суть веце як актуалны. Тадь припады здобыти функцію ці тітул не найчестнїшыма способами видиме і днесь. Любов двох молодых людей все належыть до тых найчістішых чувств. Почливость до родічів є моралным імператівом. А рівноправность каждого чоловіка, каждого народа, доднесь не є вырїшеным, закінченым дїлом.
21-го януара 2024
Сіль над золото (Велика сцена, 15.00 год.)
Театер Александра Духновіча по довшім часі вырішыв дати на сцену нову приповідку, тот раз Сіль над золото. Історію о трьох дівках і пышнім кральови знає кажда дітина і дорослый. А предсі все нас наново тото просте оповіданя несподівать свойов красов і правдов. О тім, же сіль досправды є веце як золото, но і як складне є тому порозуміти, дізнате ся, а може і дашто веце, в нашім театрі. В представліню буде много масок, гумору, чарівных возиків, дакус поезії, але головно радости, же добро знова перемогло над злом.
24-го януара 2024
Червена калина (Велика сцена, 19.00 год.)
Темы любви і войны капчають ся в творах Василія Шукшіна в ґротесковім образї нашой добы, де головный герой Єґор глядать новый жывот як рецідівіста пропущеный з арешту. В тій драматізації ёго траґікомічных повідань і новел крыє ся правда о індівідуалности вояка, котрый по войнї залучать ся до сільской соціеты. Червена калина – то сімбол грїху, од котрого Єґор буде пробовати очістити ся, і знова найти свою достойность.
25-го януара 2024
Детектор лжи (Велика сцена, 19.00 год.)
Повісте собі, же о манжелстві знате вшытко? Досправды то так є? Або… може о манжелстві не знаме абсолутно ніч? І манжелство може быти єдна велика незнама… А притім прекрасна комедія! Находиме ся в обывачцї єдного класічного панелакового квартелю. Панї Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити дїла, котры суть на першый погляд баналны. А пізнїше і фаталны. Бо уж по хвілї знайде ся меджі небом і землёв. Лїпше повіджено – посеред таємніць тридцятьрочного манжелского одношіня. Тадь хто бы ся сперав покушіню спознати істинну правду і скрыты світы свого цїложывотного партнера? Нихто. І втогды ся іщі лем почнуть дїла! Минулость шокує нашых героїв, метать їх до неочекованых сітуацій. Но публіка ся барз файнї бавить! Та ці то в жывотї аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподїванок? Подарить ся загасити тот ґротесковый пожар манжелскых боїв? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавлїню ся. На дінаміцї акторьской кооперації, іскривости словных несподїванок. Значіть! Театралный вечур повный доброй забавы, усміху, котрый вам з часу на час замерзне на ротї, сміху і радостного обчутя ся може зачати!
31-го януара 2024
Жобрацька опера (Велика сцена, 19.00 год.)
Жобрацька опера як комедія анґліцького драматурґа Джона Ґея была написана як пародія на великы оперы знаных театралных сцен, котра здобыла величезный успіх. В нашій інсценації ілуструєме оперету в середовиску злочінцїв як ундерґравндовый кабарет, де ся Мекіт званый Капітан, вождь банды бандітїв, фраїркош, дістане до любовного трикутника.
Петро МЕДВІДЬ, ЛЕМ.фм, языкова і ґрафічна управа: АРК в СР.
