28. 3. 2024: Влада СР в Ґалантї приобіцяла створїня окремой Рады влады про меншыны

В середу, 27-го марца 2024-го року, в Містьскім културнім центрї в Ґалантї одбыло ся выїздове засїданя влады Словацькой републікы. Премєр Роберт Фіцо по засїданю оголосив створіня Рады влады про народностны меншыны. Інформовала о тім аґентура TASR.

Влада в окреснім містї Ґаланта, в котрім є велике чісло мадярьского населїня, схвалила і пропозіцію зміны штатуту уповномоченого влады СР про народностны меншыны, на основі чого мають ся му розшырити компетенції, наприклад в области сполупраці з централныма орґанами штатной справы.

Змінов штатуту, за котру высловили ся і членове Выбору про народностны меншыны і етнічны ґрупы на своїм засїданю 21-го марца 2024-го року, уповномоченому дадуть ся компетенції при забезпечованю задач орґану посередника в области прав і поставлїня народностных меншын, „покля буде Уряд влады Словацькой републікы узнесїнём влады або на основі договору повіреный таков задачов“.

Єднако уповномоченый по новому буде мати можность передкладати пропозіції на засїданя владного кабінету і посередництвом премєра. Выслїдком буде подля документації ку передложеній, а теперь уж схвланій змінї штатуту, „ефектівніша можность злїпшованя условій про розвиток прав і поставліня народностных меншын“. Новый штатут є чінный дньом схваліня владов.

Премєр Роберт Фіцо по засїданю влады так само інформовав, же кабінет договорив ся на створїню окремой Рады влады СР про народностны меншыны, котра ся має выдїлити як окремый порадный орґан із сучасной Рады влады СР про людьскы права, народностны меншыны і родову рівность. За словами Фіца тото „знова дасть якость вопросам поставлїня народностных меншын.“

Припоминаме, же в минулости єствовала Рада влады про народностны і вів єй член владного кабінету – підпредседа влады СР про людьскы права і народностны меншыны. Тота функція і рада были зрушены в роцї 2012 по парламентных вольбах, котры выграла партія Smer-SD втогдышнёго і сучасного премєра Фіца із здобытком 44,31 процента голосів, чім собі забезпечіла 83 кресел в Народній радї Словацькой републікы, і не потребовала коалічного партнера на владнутя.

З Рады влады про народностны меншыны став лем Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность – порадный орґан порадного орґану влады, а намісто підпредседы влады меншыны втогды дістали уповномоченого.

Аж теперь хоче влада Роберта Фіца вернути ся до того, по чім меншыны кличуть цїлы рокы, хоць партія Smer-SD была владным субєктом нелем в роках 2012 аж 2016, але і в роках 2016 аж 2020.

Петро МЕДВІДЬ, ЛЕМ.фм, языкова і ґрафічна управа: АРК в СР. Жрідло фотоґрафії: FB / Richard Takáč – minister pôdohospodárstva a rozvoja vidieka