28. 5. 2020: Eвропска комісія хоче дати поміч по крізї про членьскы країны 750 міліард евр

Европска комісія (ЕК) хоче в рамках покрізовой обновы европскых економік  дати членьскым штатам Европской унії (ЕУ) 750 міліард евр. Пів біліона із той сумы, котру собі планує пожычіти на фінанчных торгах, будуть творити прямы платбы, звышок уверы. Ознамила то шефка ЕК Уршула фон дер Леєнова (на архівній фотцї в червенім саку).                        

Пінязї собі хоче ЕК пожычати на фінанчных торгах, за довг бы ручіла будучім сімрочным розрахунком, в котрім бы мало быти довєдна 1,1 біліона евр. Подля фон дер Леєновой є сучасна кріза ключовым моментом про будучность европского блоку. Комісія захранным фондом реаґує на найвекшый економічныхй выпадок в історії ЕУ, котрый запричінили коронавірусовы обмеджіня.

„План обновы з тяжкой вызвы, котрій теперь челиме, вытварять шансу. Нелем тым, же підпорить економікы, але і інвестіціями до будучности. Зеленый договор про Европу і діґіталізація підпорять заместнаность і рост, одолность нашой сполочности і якость нашого жывотного середовиска,‟ повіла фон дер Леєнова при презентації пропозіції комісії в Европскім парламентї.

Екзекутіва Унії пропонує розрахунок, котрого обєм приближно одповідать пропозіції, котру у фебруарї членьскы штаты не схвалили. Наповнити го хоче, окрем дотеперінїх здроїв, прибытками в подобі еколоґічных ці діґіталных даней.

Членьскы штаты сі подля представителїв комісії будуть мочі выбрати, ці хочуть приспіти до сполочной касы данём приймів з емісных поволїнь, ново пропонованым цлом із нееколоґічно выбраных продуктів, зважовати діґіталны данї ці далшыма поплатками.

Здрой: Dennik N