28. 6. 2022: До найменше розвитых окресів Земпліна і вышнёго Шаріша мають іти десяткы міліонів евр
До найменше розвитых окресів на Земпліні і у вышнім Шарішу будуть в слідуючіх роках прямовати десяткы міліонів евр.
До минулорічной вызвы, котра была про найменше розвиты окресы, зо замірянём на будованя і реконштрукцію містных комунікацій, могли приголосити ся села з чіслом жытелїв до 500 без потребы сполуфінанцованя. Міністерство інвестіцій, реґіоналного розвитку і інформатізації Словацькой републікы (МІРРІ) о тім аґентуру TASR інформовало в реакції на пожадавкы старостів і пріматорів Земпліна і вышнёго Шаріша.
„Актуално можуть самосправы змагати ся о фінанчны средства з реґіоналной дотації. Тота є давана з розрахунковой капітолы МІРРІ в згодї з планом ровитку,“ інформовав резорт. Про окресы Меджілабірцї, Бардеёв, Снина, Стропків і Михалівцї є на тот і слїдуючій рік алокованых понад 2,5 міліона евр.
Вызва про окрес Михалівцї з діспонібілныма средствами майже 1,3 міліона евр, выголошена 21-го юна 2022-го року, є заміряна на містный економічный розвиток і робітность, причім уможнює выникнутя соціалных і сільскых подників ці розвиток промыслу, служеб і земледїльства.
В рамках розвитку турістічного руху є мож наприклад будовати ціклотрасы або розшырити понуку реґіоналных выробків. Підпореныма областями є і обнова сел а якость жывотного оточіня, як і розвиток людьскых джерел.
Новы планы розвитку на період років 2022 аж 2026 мають дотуляти ся довєдна 19-ёх найменше розвитых окресів на Словакії. До реґіону Шаріша і Земпліна має на тот цїль іти довєдна 31,6 міліона евр. Найвеце, майже пять міліонів, до окресу Михалівцї, найменше, нецїлых 1,9 міліона евр, до Меджілабірьского окресу.
В тім роцї бы мали быти іщі выголошены вызвы про окресы Сабінів, Свідник, Воронів над Топлёв, Собранцї і Требішов.
Старостове і пріматоры з восьмох окресів выходу Словакії представили в пятніцю, 24-го юна 2022-го року, вісем пожадавок на змірнїня наслїдків скорого і великого роснутя цїн енерґій і інфлації на самосправы. Дакотры были повязаны і з намагами о змірніня реґіоналных роздїлів.
До кінця октобра 2022-го року жадають представити конкретны крокы ку вырївнаню реґіоналных роздїлів на Земплінї.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР
