28. 6. 2023: Меджі Бардеёвскыма Купелями і Криніцёв зачінать ходити реґуларно автобус

Автобус буде ходити реґуларно цїлый рік.

Пряшівскый самосправный край (ПСК) запроваджать од 1-го юла 2023-го року автобусове споїня меджі Бардеёвскыма Купелями і Криніцёв у Польщі. Денный автобус буде ходити на трасї Бардеёвскы Купелї – Бардеёв – Криніця.

Іде о пілотный проєкт, котрый має підпорити черезгранічный транспорт і турізм. Путуючі автобус будуть годны хосновати двараз денно в каждім напрямі. З Бардеёва до Криніцї ся дістануть за 45 минут.

Выгодне і про жытелїв пригранічных сел

„Перепоїня словацького і польского приграніча є про наш край вызначнов пріорітов, зато я барз радый, же ся нам подарило выбавити автобусове споїня до Криніцї,“ повів председа ПСК Мілан Маєрьскый.

За ёго словами часы одходів автобусів суть наставлены так, жебы мож было абсолвовати єдноднёвы вакації польскым турістам на Словакії, як і словацькым в Польщі. Вдяка тому, же автобусы підуть цїлый рік, хосновати їх будуть годны і жытелї пригранічных сел в рамках штоденных потреб.

Автобус буде, як сьме споминали, ку діспозіції в каждім напрямі двараз за день, і цїла траса Бардеёвскы Купелї – Бардеёв – Криніця буде тырвати єдну годину.

Путуючі автобусом будуть годны хосновати заставкы в Бардеёвскых Купелях, на штації і заставках у Бардеёві, в Мокролузї, Рокытові, Тарнові, Курові, Тыличу коло головного розпутя, в центрї Криніцї, як і на желізнічній штації в Криніцї, де мож переступити на автобусы і влакы в рамках Польщі.

Хотять притягнути турістів

„Мы рады, же вдяка сполупраці з Пряшівскым самосправным краём маєме таке меджінародне споїня, котре скапчало дві купельны міста і нашым купельным гостям уможнить спознати польскый бік і Кирніцю. А може тото нове споїня принесе і новы ідеї, што бы сьме могли у нас в Бардеёвскых Купелях вылїпшыти. Тіїыме ся, же до нас притягнеме польскых турістів і вкажеме їм, якы нашы купелї суть красны,“ повів председа представенства Бардеёвскы Купелї, а. с., Ярослав Комора.

„Бардеёв і Кирніця суть важныма купельныма центрами і центрами турістічного руху, што творить значный сінерґічный потенціал. Вірю, же концепт реґуларного черезгранічного транспорту собі поступом часу найде достаток путуючіх, і помоче тым акцелеровати сполупрацу на уровни окремых особ і бізнісовых субєктів зо вшыткыма економічныма, културныма і соціалныма бенефітами про реґіон,“ доповнив жупан Маєрьскый.

Што до ціны листків, платить штандардна таріфа примістьского транспорту включно їнижок цїн, котры люде знають з автобусового транспорту в рамках IDS Východ, значіть в Пряшівскім і Кошыцькім краю. Заплатити буде мож як в готовости, так і банкоматовов картов у автобусї.

ПСК веде далшы їднаня з Малопольскым воєводством о запроваджіню далшых автобусів в слїдуючіх роках. Єднов з можностей є автобус Новый Тарґ – Спішска Нова Вес – Червеный клаштор, котрый бы мало забезпечіти Малопольске воєводство у 2024-ім роцї.

Петро МЕДВІДЬ, ЛЕМ.фм, языкова і ґрафічна управа: АРК в СР