28. 7. 2022: Людміла ШАНДАЛОВА: Лїто, Доджівно вночі, Є докошено (Стихы)

Людміла Шандалова

Лїто

Лїто є в повній силї

Діктує спраготу

од рана выливать тепло

заробіток не жадать

 

Кедь ся му захоче

Пошле влагу в гырмотнїй хмарї

заставить спалюючій дых

Дасть одпочіти краю

 

Бы го знову розосміяло

фаребным квітём

Зеленым гаём

Пташками під белавым небом

Насытило плодами

Розгуло веселым вітриком

далеко-шыроко по гумнах

 

Приїмам, што нукать

 

Лем жебы ся скоро не высилило

 

 

Доджівно вночі

В ночі падало

Шустило за облаком в тихім напіві

Змывало порох з намагы прошлого дня

Монотоннї приколисало сон

До скрыш загнало вшытко жыве

Оросило благодарнї лїсы

Полям даровало влагу

Зо спароты схолодило драгы

Падало і падало

Насытило край вдячностёв

 

Рано ся зміловало

А послало сонце

 

 

Є докошено

Є докошено

Впало послїднє стебло

Лука замлїла

Спарота высала зелену щаву

Нїжне квітя зложыло головкы

земля ствердла

пожовтїло

Поблядло

Лем боцаны ся радують потраві

Косець ся навернув домів

Грабачкы доспівали

Што было уж нїт

Нашы ступляї не знати

Стернянка коле до душы

 

На боку

сходить нова трава

нове квітя

насычене новов пахотов

 

Там мі треба зыйти

 

(Выбране з Літературного конкурзу Марії Мальцовской 2021)