28. 9. 2023: Мадярьско має по списованю менше жытелїв, но Русинів є веце

Нароснув і русиньскый язык як материньскый.

Чісло жытелїв Мадярьска ку 1-му октобру 2022-го року было подля списованя жытелїв, яке было із 2021-го року перенесене на минувшый рік, 9 603 634. Од 2011-го року популація в Мадярьску знижыла ся о веце як 300 тісяч людей.

Інформовав о тім Централный штатістічный уряд у віторок, 26-го септембра 2023-го року. В роцї 2011 жыло в Мадярьску іщі 9 937 628 жытелїв. На неповинный вопрос о народности одповіло 86 процент людей. Русины наперек низшій популації в Мадярьску наросли.

Найвекшов меншынов суть Ромове

Мадярьско має тринадцять офіціално узнаных народностных меншын. Найвекшов меншынов зістали Ромове, ку котрым приголосило ся 209 909 особ, но значно стратили. В роцї 2011 ку тій народности голосило ся понад 315 тісяч людей.

Другов найвекшов меншынов є нїмецька. Ку Німцям приголосило ся 142 551 особ, а так само є їх менше як в попереднїм списованю, коли їх было іщі 185 696. Третїма найвекшыма суть Словаци, котрых ся приголосило 29 881, в роцї 2011 їх было іщі 35 208.

Ку Булгарам приголосило ся 6 109 людей, Ґреків є дакус веце, кедь подля списованя людей із 2022-го року рахують 6 178 особ. Ку хорватьскій народностній меншыні ся голосить 21 824 особ, Поляци наросли, кедьже ся ку тій меншынї приголосило 7 398 людей, причім в роцї 2011 то было 7 001 особ.

Арменів є в Мадярьску за остатнїм списованём 4 199, в попереднїм списованю їх было 3 571. Румунів є 27 554, но погіршыли собі, бо было їх в роцї 2011 іщі 35 641, Сербів ся приголосило 11 662, а так само наросли в поріваню з попереднїм цензом, коли їх было 10 038.

Наросли і Словены, котрых є ку октобру 2022-го року 3 965, а в роцї 2011 їх было 2 820. Радікално наросла україньска меншына, котра раховала в роцї 2011 лем 7 396 людей, а теперь ся ку ній приголосило 24 615 особ.

Русины знова росли

Русиньска народностна меншына в Мадярьску так само може похвалити ся успішныма резултатами, а то як в чіслї особ, котры приголосили ся ку народности, так і в чіслї тых, котры записали собі русиньскый язык як материньскый.

Ку Русинам приголосило ся у 2022-ім роцї 7 111 людей, в році 2011 то было лем 3 882 особ. Покля в попереднїм списованю собі материньскый язык русиньскый записало 999 особ, теперь є то уж 1 981 людей.

Списованя в Мадярьску мало і вопрос на язык, котрый хоснує особа в родинї або меджі приятелями. І в тій катеґорії Русины наросли, бо в роцї 2011 до той катеґорії русиньскый язык записало собі 1 131 особ, а теперь 2 382.

Із тых резултатів відїти, же русиньска комуніта в Мадярьску не выросла лем на міґрації, але же знова веце приголосило ся домашнїх Русинів, котры уж не знають язык, але принавертають ся ку свому походжіню, за што треба подяковати актівній роботї русиньскых орґанізацій і самосправовань.

Мадярьско страчать віру

Списованя із 2022-го року вказало, же штораз менше людей в Мадярьску голосить ся ку віроісповіданю, наопак, радікално росне чісло тых, котры не одповіли на тот вопрос.

Ку Римокатолицькій церькви, котра є найвекшов, приголосило ся 2 643 885 людей, в роцї 2011 то было 3 691 389, а в роцї 2001 аж 5 289 521 особ. Ґрекокатолицька церьков за остатнїм списованём рахує 165 135 віруючіх, притім в роцї 2011 їх было понад 179 тісяч, а в роцї 2001 докінця аж нецїлых 269 тісяч.

Православны суть подїлены подля приналежности до окремых церьковных юрідікцій. До ґрецькых православных записало ся 3 443 людей і значно наросили, російскых православных є 2 462, сербскых 1710, булгарьскых 475, румуньскых 3 618 і представлюють найвекшу православну комуніту в Мадярьску.

Україньскых православных є 1 404, такы віруючі в попереднїх списованях не были. Ку „іншым православным“ голосить ся 2 466 особ.

З великых традічных мадярьскых віроісповідань мож іщі спомянути калвінів, котрых ся приголосило 943 982, і є то друга найвекша церьков по римокатоликах, а євангеликів, котрых жыє в Мадярьску 176 503. Но і тоты церькви стратили віруючіх в порївнаню з попереднїма списованями.

Без віроісповіданя є 1 549 610 особ. Тых, котры не одповіли на вопрос о віроісповіданю, є 3 852 533. В роцї 2011 то было 2 698 844 особ, а в роцї 2001 лем 1 104 333.

 

Петро МЕДВІДЬ, ЛЕМ.фм, языкова і ґрафічна управа: АРК в СР.