29. 1. 2023: Вказал ся 5. Рапорт з реализациі Польском Республиком Рамовой конвенциі про охорону нацийональных і етнічных меншын
12. січня/януара тр. Рада Міністрів – по розсмотріню в режімі поза засіданьом – приняла 5. Рапорт з реализациі Польском Республиком Рамовой конвенциі про охорону нацийональных і етнічных меншын. Є то пятый рапорт зрыхтуваный для Ґенерального Секретаря Рады Европы, был він зробленый на основі інформаций переданых м.ін. орґанами публичной адміністрациі та експертскым середовиском.
Рапорт чыслит 76 стран і поділеный є на дві части. Перша обнимат загальну характеристику меншын в Польщы, друга односит ся до реализациі обовязків выникаючых з поєдных статій Рамовой конвенциі в однесіню до реализаций з попереднього рапорту. В векшости пунктів авторы рапорту подают, што не однотувано змін в однесіню до попереднього документу. Дрібницьово натоміст представлены сут діяня, што были підниманы державом в періоді 2017-2021, котрых цілю было підтриманя і розвиток достоменности нацийональных і етнічных меншын та доступ до середків масового переказу. В найновшым рапорті поміщено тіж м.ін. актуализацию списку ґмін, в котрых хоснуваны сут назвы в языках меншын. Найвеце місця в рапорті занимат характерситика стану мешынового вчыня. Цілый рапорт доступный єст на сайті Міністерства Внутрішніх Справ і Адміністрациі як властивого орґану до справ меншын.
«Забытый світ Лемків і Руснаків» – глядают експертів
Ґміна Устя Рускє реализує проєкт «Забытый світ Лемків і Руснаків» спілфінансуваный з середків Проґраму Трансграничной Спілпрацы Interreg V-A Польща-Словация 2014-2020 і в звязку з проєктом запрашат експертів Ґрупы дс. будовы музейного туристичного продукту – Музею Лемків і Русинів. Експерты повинны мати знаня з обшыри туристикы або заряджаня туристиком, знаня про традициі, спадковину та культуру Русинів, што мож потвердити діяльністю ци інчыма осягнінями. Цілю діяня Ґрупы є будова туристичного продукту – музею Лемків і Руснаків, та введіня постійных механізмів спілпрацы і комунікациі медже партнерами проєкту. Плянуваны сут 32 стрічы в Польщы і на Словациі (Ґміны: Устя Рускє, Зборів, Кружлів). Експерты не будут отримувати вынагороджыня. Заінтересуваны особы можут складати аплікациі до кінця січня/януара в будинку Ґміны Устя Рускє.
Польско-словацкы бізнесы
В минулый четвер 19. січня/януара прошла в Кракові одкрыта конференция пн. «Doing business in Slovakia», котру орґанізували Центр Business in Małopolska та Польско-Словацка Промыслово-Гандльова Ізба. Як підкрислили орґанізаторы, в 2021 р. Словация была для Польщы 10. партнером в експорті, а подля даных Головного Статистичного Уряду польско-словакы гандльовы оброты в 2021 р. вынесли веце як 12 600 млн евро, што означат звекшыня о 23% в однесіню до 2020 р. Головном цілю конференциі было передати малопольскым фірмам помічны інформациі, жебы рішыти войти на словацкій рынок, зміцнити там свою позицию, змінімализувати ризико і уникнути найчастійшых блудів. Стріча была і нагодом, жебы поглубити знаня і стірити експертів і практиків словацкого рынку. Патронат над подійом тримали Маршалок Малопольского Воєвідства, Польска Аґениця Інвестициі і Гандлю та Амбасада Словацкой Республикы.
Анкєта про розвиток Ґміны Санкова
Ґміна Санкова вєдно з інчыма малопольскыма курортами приступує до опрацуваня Стратеґіі Розвитку Малопольскых Курортных Ґмін в перспективі 2021-2027. То необхідный документ, жебы мочы старати ся через самоуряды о середкы на розвиток публичной і загальнодоступной інфраструктуры звязаной з курортном діяльністю. Жебы ліпше окрислити пріоритеты, ґміна просит выполнити анкєту звязану з опінійом жытелів ґміны, але і туристів, курортників і вшыткых заінтересуваных про оціну ґімны як курорту, про єй дотеперішню оферту, добры і слабы страны. Анкєта є коротка, доступна до выполніня онляйн на сайті ґміны Санкова.
