29. 12. 2021: Найменше розвиты окресы дістануть о 12 міліонів веце

Будовати і реконштруовати ся будуть драгы і ходникы.

Міністерство інвестіцій, реґіоналного розвитку і інформатізації Словацькой републікы выїднало з Міністерством фінацній веце грошей на обновлїня містных комунікацій, ходників і на розвиток турістічного руху про найменше розвиты окресы.

Як інформовала аґентура TASR, первістну алокацію вызвы в сумі 4,9 міліона евр підняли о далшых 12 міліонів, причім так підпорять 150 сел. Передтым мало ся підпорити лем 50 сел.

„Села і міста мають великы проблемы із своїма містныма комунікаціями, котры не дають ся фінанцовати із еврофондів. Сільскы драгы і ходникы суть часто в такім ставі, же огрожують безпечность і здравя людей,“ підкреслила віцепремєрка і міністерка про реґіоналный розвиток Вероніка Ремішова.

Поміч піде до 150-ёх сел в дванадцятёх окресах. На выходній Словакії то будуть села в окресах Кежмарок, Сабінів, Собранцї, Свідник, Требішов і Воронів над Топлёв. Вызва была про села з дванадцятёх найменше розвитых окресів, котрым у 2020-ім роцї скінчіла можность черьпати фінанції.

Села подля резорту передложыли множество проєктів, з котрых найвекшу часть творили якраз актівности повязаны з будованём і реконштрукціёв комунікацій і ходників.

Міністерство інвестіцій, реґіоналного розвитку і інформатізації інформовало, же окрем проєктів з той вызвы почас рока підпорили ся і іншы проєкты про вісем найменше розвитых окресів за нецїлых 6 міліонів евр, котры передкладали міста, села і здружіня.

„Проєкты были заміряны на ревіталізацію публічных просторів, злїпшіня обчаньской выбавлености і проєкты реґістрованых соціалных подників, цїлём котрых є інтеґрація зневыгодненых кандідатів на роботу на робочім рынку, як і проєкты бізнісовых субєктів заміряных на іновацію выробных процесів,“ написав резорт.

Підпорены проєкты прямо вытворять новы робочі місця в окресах Бардеёв, Ґелніця, Кошіцї-околіця, Левоча, Меджілабірцї, Михалівцї, Стропків і Снина.

Петро МЕДВІДЬ, ЛЕМ,фм. Ґрафічна і языкова управа: ред. АРК в СР.