29. 12. 2023: Словацька влада выменовала уповномоченого про меншыны. Кабінет має в планї рушыти меншыновый фонд
Влада Словацькой републікы на своїм засїданю 20-го децембра 2023-го року выменовала нового уповномоченого про народностны меншыны. Тота функція была необсаджена од 25-го октобра, коли быв одкликаный Ласло Буковскый.
Новым уповномоченым влады Словацькой републікы про народностны меншыны став Акош Горонь. Ёго выменованя є схвалене ку 21-му децембру.
Словацька влада так само публіковала леґіслатівный план на 2024-ый рік, в рамках котрого хоче зрушыти меншыновый фонд.
Акош Горонь
Мґр.арт. Др.Юр. Акош Горонь (1975 р.) є родаком із Дунайской Стреды. Абсолвовав штудії на Высокій школї вытварных умень в Братїславі, і на Католицькій універзітї Петра Пазманя – на Факултї права і державы, в Будапештї
Горонь быв умелцём у вольній професії, пізнїше быв і асістентом державного секретаря Міністества културы Словацькой републікы ці асістентом посланця Народной рады Словацькой републікы.
В остатнїх роках быв і членом языковой експертной ґрупы про мадярьскый язык на Урядї уповномоченого влады СР про народностны меншыны. Тоты ґрупы про окремы меншыны приготовлюють до языків меншын переклады законів, меджінародных договорів і далшых матеріалів.
Акош Горонь є так само посланцём,Містьского заступительства в Дунайскій Стредї а председом Комісії Містьского заступительства в Дунайскій Стредї про дїла хоснованя языка народностной меншыны.
За нашыма інформаціями має новый уповномоченый близко ку мадярьскій владї Віктора Орбана. За мадярьску сторону сидїв і на засїданях Змішаной словацько-мадярьской комісії про дїла меншын.
Влада хоче рушыти меншыновый фонд
Словацька влада так само пубкіковала План леґіслатівных задач влады СР на рік 2024. На місяць юн є напланона Пропозіція закона о Фондї на підпору културы, котрой ґестором має быти Міністерство културы СР.
„Пропозіція закона буде передложена на основі Проґрамового выголошіня влады Словацькой републікы 2023 – 2027. Фонд на підпору културы буде давати підпору културї в слїдуючіх областях: державный язык і словацька література, жыва култура, културна дїдовизна, і култура народностных меншын. Фонд выникне реорґанізаціёв дотеперішнїх верейноправных фондів, котра має реалізовати ся злучінём Фонду на підпору уменя і Фонду на підпору културы народностных меншын,“ пише ся в матеріалї.
Приятям такого закона бы ся зрушыли два фонды, меджі нима меншыновый, а зробив бы ся єден новый. План леґіслатівных задач влады СР на рік 2024 є моментално в меджірезортнім припомінковім процесї.
Выникла уж громадна припомінка
Фонд на підпору културы народностных меншын выникнув у 2017-ім році, почас третьой влады Роберта Фіца, коли в коаліції мала його партія Smer-SD і партію Most-Híd. Першы вызвы з фонду были на рік 2018.
Проти рушіня меншынового фонду уж выникла громадна припомінка, котрой орґанізаторами суть Конрад Ріґо, Ласло Буковскый і Абел Равас.
„Фонд на підпору културы народностных меншын єдночасно є і єдинов законом зрядженов інштітуціёв народностных меншын на Словакії. Зато тота інштітуція є з погляду правного поставлїня народностных меншын елементарно важнов, і їй зрушіня, респектівно злучіня з іншов інштітуціёв, бы значіло єднозначный крок назад і з людьскоправного погляду,“ пишуть орґанізаторы припомінкы.
В припомінцї ся пише і то, же дві области, о котры ся теперь окремо старать Фонд на підпору уменя і Фонд на підпору културы народностных меншын, суть незлучітельны.
„Новый фонд бы не доказав повнити свою задачу выходячу із закона ани в области підпоры културы народностных меншын, ани в области підпоры словацькой културы – што мало быти первістным заміром законодавцю.“
Як далше пише ся в припомінцї, зряджіня народностного фонду в роцї 2021 оцїнила і Змішана мадярьско-словацька комісія про дїл меншын, як і Рада Европы в послїднїй Справі о імплементації Рамкового договору на охрану народностных меншын в СР.
Петро МЕДВІДЬ, ЛЕМ.фм, языкова і ґрафічна управа: АРК в СР.
