29. 2. 2024: Підкарпатьске воєводство помогло ПСК сумов 140 тісяч евр

По землетрясїню із октобра 2023-го року помагать Пряшівскому самосправному краю (ПСК) і Підкарпатьске воєводство в Польщі. Як інформовала Леа Леготьска з Оддїлїня комунікації ПСК, в тых днях парламент воєводства схвалив фінанчну поміч в сумі 140 тісяч евр.

Тоты грошы мають помочі одсторонити шкоды у Вігорлатьскім музею в Гуменнім, і в Піддукляньскім освітнім центрї в Свіднику. Іде о културны інштітуції, котры суть зряджованы краём. Партнерскый реґіон схвалив про ПСК фінанції почас свого засїданя 26-го фебруара 2024-го року.

„Пряшівскый край по землетрясїню із 9-го октобра 2023-го року знайшов ся в тяжкій сітуації, а і дакілько місяцїв по ничівій катастрофі боює з наслїдками. Зато ку каждій помочі, котра нам є адресована, приступаме з великым решпектом,“ повів підпредседа ПСК Ярослав Макатура почас понедїлькового засїданя згромаджіня Підкаркарпатьского воєводства і особной стрїчі з маршалком Владиславом Ортилом.

„Дякуєме, же і Підкарпатьске воєводство придало ся ку тым, котры не лишыли нас самых, а помогли ку сохранїню нашого архітектонічного покладу в Гуменнім, і културного центра в Свіднику. Тота поміч вказує, як міцне і важне є наше партнерство,“ повів Макатура.

У Вігорлатьскім музею в Гуменнім землетрясїня запричінило великы шкоды – попукали стїны внутрї і на вонкашнїх фасадах. Єднакы проблемы має по землетрясїню і Піддукляньскый освітнїй центер у Свіднику, пуклины суть головно на частях, котры капчають стару і нову будову, пошкоджены были і ґарадічі в старім обєктї.

ПСК віыдїлив першу фінанчну поміч на оправу великых матеріалных шкод на пріватнім і публічнім маєтку іщі в октобрї 2023-го року. Посередництвом крайской фундації перероздїлив 136 тісяч евр меджі особы і родины з окресів, котры засягло землетрясїня.

В другій фазї дав фінанчны средства юрідічным субєктам, точнїше селам, містам і церьквам. Было то у фебруарї того року, причім меджі 22 субєктів роздїлив 150 тісяч евр.

Петро МЕДВІДЬ, ЛЕМ.фм, языкова і ґрафічна управа: АРК в СР