29. 3. 2022: Вселеньскій Патріарха в Польщы

В недільный вечер, 27. марця 2022 р., зачала ся тридньова візита в Польщы Вселеньского Патріархы Варфоломія І. Першым єй пунктом была доксолоґія – привитаня в каплици свв. Кірила і Методия в Варшаві, яка находит ся при митрополитарній катедрі на варшавскій Празі.

Архієпископа Константинополя і Нового Риму привитал предстоятель Польской Автокефальной Православной Церкви митрополита Сава при участи єпископів, священників і грецкой соспільности. В стрічы, яка проходила в Центрі Православной Культуры, участ брали предовшыткым біженці з Украіны, якы нашли місце як раз при митрополитарным домі. Патріарха приіхал до Польщы головно зато, жебы мочы стрітити біженців і вказати свою молитву і солідарніст.

В понедільок, 28. марця, патріарха стрітил ся з президентом Польской Республикы Анджейом Дудом і першом дамом Аґатом Корнгаузер-Дудом. Президентска пара приняла гостя в Бельведері. Вчас стрічы представник константинопольской Церкви дякувал польскому президентови за запрошыня. Варфоломій І в своім выступліню выразил вдячніст, што польскы громадяне сильно помагают і сперают украіньскых біженців.

«Смотриме зо зворушыньом, што днес Ваша Святіст, як струдженый поломник прибыват зо своім благословліньом до тых 2,3 мілийона біженців з Украіны, якы пришли до нашой державы, штобы іх потішыти, благословити, жебы молити ся вєдно з нима і з нами за іх отчызну», бесідувал Анджей Дуда на початку стрічы.

Так само в понедільовый поранок, 28. марця, Вселеньскій Патріарха пришол помолити ся до храму св. Йоана Климака на варшавскій Воли. Поздравил вірных парохіі і звернул ся зо словом до біженців. Пак патріарха пришол на поблизкій гріб митрополити Діонісия (Валединьского), при котрым одправил коротку молитву за душы помершых предстоятелів ПАПЦ.

О 17.00 год. Варфоломій І прибыл до будуваной новой варшавской святыні – Агія Софіі при ул. Пулавскій (в 2015 р. посвятил угольный камін під єй будову). Окрем молитвы, патріарха при участи митрополиты Савы стрітил ся з вірныма, біженцями і вшыткыма, якы пришли привитати константинопольского гостя.

Вселеньскій Патріарха буде перебывал в Польщы до середы, 30. марця. 29. марця, стрітит ся з преставниками римокатилицкой Церкви.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)