29. 4. 2017: Словацькый посланець: „Русины на Українї мають быти узнаны.‟

На україньскім порталі УКРІНФОРМ быв публікованый розговор Андрія Лавренюка з посланцём Народной рады Словацькой републікы і єдночасно председом парламентного Загранічного выбору – Франтішком Шебеём, членом коалічной партії Most-Híd.

Лавренюк зо Шебейом бісїдує як з єдным із найвешкых одборньків в областях европской і евроатнантічной інтеґрації. Звідать ся го на позіцію Словаків односно Україны і Росії, на односины міджі Українов і Словакіёв, но бісїдує з ним і о сучаснім ставі Европской унії і їй будучности. Не выхаблять ани проблематіку реформ на Українї, конфлікт на выходї державы, ці вопрос Крыму.

Окрем того, редактор говорить о тім, же „на Українї вже не раз были заставлены пробы выкликати конфлікты на основі народностной ідентічности Русинів, котры мають сполочну історію зо Словаками…“

Франтішек Шебей редакторови припоминать, же на Словакії суть Русины узнанов народностнов меншынов, што їм давать вшыткы права, включно языка і народностного школства. Словацькый посланець так само говорить, же то, же на Українї не суть Русины узнаны, видить як проблем у сферї людьскых прав і прав народной ідентічности „давного народа“.

„Я сам думам, же Русины мають быти вызнаны як народностна меншына на Українї, як то было зроблене і односно представителїв іншых народів,“ продовжує в розговорї Шебей.

Франтїшек Шебей

Франтїшек Шебей (1947) є родаком із Братїславы. Закінчів псіхолоґію на Філозофічній факултї Універзіты Коменьского в Братїславі. До року 1992 робив у рамках псіхолоґічных бадань. В рр. 1990 – 1992 быв членом презідії Словацькой академії наук. В тых самых роках быв і посланцём Федералного згромаджіня Чехословакії (федералный парламент) і председом Загранічного выбору Сеймовні народів Федералного згромаджіня (єдна із комор федералного парламенту). В рр. 1998 – 2002 быв посланцём Народной рады Словацькой републікы і председом парламентного Выбору про европску інтеґрацію. Од 2010-го року аж дотеперь є зновапосланцём словацького парламенту і єдночасно председом Загранічного выбору.

Жрідло фотоґрафії: most-hid.sk

П. М.