29. 4. 2022: Lemko Hall упамятнит 75. річницю выгнаня

28. квітня/апріля 1947 р. зачала ся Акция «Вісла», депортацийна операция, в рамках котрой постепенно до кінця липця/юлия 1947 р. польскє войско выселяло жытелів Лемковины на західні і пілнічны землі повоєнной Польщы.

То траґічна річниця в нашій істориі, кєд же Акция «Вісла» довела до материяльного, культурового і духового знищыня вельовіковой дідовизны Лемковины. Тота смутна річниця в тым році буде вынятково споминана не лем через самых Лемків на Лемковині, але тіж діаспору в Америці.

Єдны з такых упамятнінь уж неодолга пройдут в Йонкерсі (штат Ню Йорк). Подію орґанізує Lemko Hall. Упамятніня одбудут ся в неділю, 15. мая 2022 р.

Подія зачне ся панихідом, яка буде служена о 14.00 год. в православній церкви Святой Тройці в Йонкерсі. По панихіді в церковным голю зорґанізуваный буде почастунок, мож буде тіж выслухати презентацию і взяти участ в дискусиі.

Рахує ся, же депортациями в 1947 р. было обнятых праві 150 тис. люди, в тым чыслі 35-45 тис. Русинів з Лемковины (хоц точны даны дотепер не сут знаны). Акция «Вісла» причынила ся до знищыня лемківского доробку поколінь та зміны культурового облича Лемковины.

Севериян КОСОВСКЫЙ, ЛЕМ.фм. Фото: Lemko Hall

(Публікуєме в оріґіналї – лемківскім варіантї русиньского языка.)