29. 4. 2022: Проґрам Театру Александра Духновіча в Пряшові на місяць май 2022
Приносиме вам проґрам Театру Александра Духновіча в Пряшові на місяць май 2022-го року.
11-го мая 2022
„Шість персонажів шукають автора“ (Велика сцена, 19.00 год.)
На фонї театралной пробы і нервозного режісера одогравать ся траґічна історія персон розпаднутой родины, котры жыють драмов і глядають смысел правды і ілузії на сценї. Пєса є в україньскім языку.
13-го мая 2022
12 стілцїв (Велика сцена, 19.00 год.)
Рафінована карікатура совєтьской сістемы і людьского ненажерства ся злучує в історії Іпполіта Воройбанинова і великого комбінатора Остапа Бендера, котрых наганяня ся за покладом приведе до різных небезпечных і комічных сітуацій.
18-го мая 2022
Любов до ближнёго (Велика сцена, 19.00 год.)
Театер Александра Духновіча представлює інсценацію од єдного із найзнамішых російскых драматіків 20-го столїтя Леоніда Николаєвіча Андреєва. Тота комедія вказує на абсурдность нашого світа і нонсенс жывота, де трафунковы поставы чекають на смерть нещастливця коло вычапу і страчають чутя і любов до ближнёго.
27-го мая 2022
Червена калина (Велика сцена, 19.00 год., 1-ша премєра)
Темы любви і войны капчають ся в творах Василія Шукшіна в ґротесковім образї нашой добы, де главный герой Єґор глядать новый жывот як рецідівіста пропущеный з арешту. В тій драмазітації ёго траґікомічных повідань і новел крыє ся правда о індівідуалности вояка, котрый по войнї залучать ся до сільской соціеты. Червена калина – то сімбол грїху, од котрого Єґор буде пробовати очістити ся, і знова найти свою достойность.
Выступлїня ТАД мімо Пряшів:
7-го мая 2022
Зістали за дураків (Културный дім Словінкы, 15.00 год.)
Україньскый комедіоґраф Марко Лукич Кропивницькый представлює ся в Театрї Александра Духновіча далшов комедіёв. 12 дївок на оддаваня, но жаден жених, холем не на першый погляд. Богатый млинарь Кукса і ёго сусїд, коваль Дранко, суть безнадійны в гляданю богатого мужа про своє велике потомство, но не знають, же жены ся о себе знають постарати самы, і поміч од отців їм нияк не треба.
12-го мая 2022
Златый ключік (Културный дім Гуменне, 10.00 год.)
Буратіно, главный ґерой приповідкы Алексія Толстого Златый ключік або Буратіновы авантуры, то жываньска, непослухняна і неконечно зведава, но наперек тому сімпатічна деревяна лялька із довгым носом, котрый як кебы быв на тото, жебы го маїтель пхав там, де не треба. Буратіно має ніс, котрый вынюхать кажду авантуру, небезпеку, но і способ, як із того добрі выйти, і не лем то – поможе му найти то, по чім вшыткы тужыме – златый ключік, котрым дають ся одкрыти дверї до щастливого жывота…
24-го мая 2022
Царь пав (Културный дім Свідник, 16.00 год.)
Колись давно в царьстві за морём жыло ся в безмірнім добробытї. Но люде вшытко зачали брати поверьхно, добробыт їм закрыв очі і відїли лем вонкашню красу. То царя доброго і справедливого барз скламало і ёго смуток і гнїв запричінили, же вшыткы ёго підданы змінили ся на павы. Кажду ніч на пава змінить ся і царь. Сам і опущеный глядать щастя. Хто і што царя выслободить? Буде то любов? В іншім царьстві, далеко од моря, якраз народила ся красна прінцезна Руженка, котра своїм добрым сердцём перенесе ся через вшыткы проблемы.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
