29. 8. 2022: В Зборові хотять створити музейну експозіцію присвячену Русинам

Як інформує аґентура TASR, в Каштелю Шередія із 16-го столїтя створить село Зборів в окресї Бардеёв музейну експозіцію. Буде присвячена Маковіцькому панству, але і културї Русинів.

Подля старосты села Яна Шуркалы є каштель правдоподобно найстаршов світьсков будовов у інтравіланї села.

„Дали го збудовати Шередіёвы, котры в тім часї властнили Маковіцьке панство. Хосновали го як лїтню резіденцію. То ставба, котра звонка здає ся, же не є велика, але має пять штоків, пивніцї і велику повалу,“ повів про аґентуру Шуркала.

Обєкт быв у минулости хоснованый як уряд лїсной справы. У 1969-ім роцї каштель выгорів, одвтогды будова ішла до занепадку, кедьже не зробила ся нова стрїха. Перед семома роками з ініціатівы Здружіня на захрану Зборівского замку і села подарило ся зробити нову стрїху.

З проґраму черезгранічной сполупраці Interreg V-A Польща – Словакія 2014 – 2020 село здобыло фінанції на проєкт з назвов Забыта країна Лемків і Руснаків. Цїлём є реконштрукція каштеля, котру моментално реалізують.

„Хотїли бы сьме там створити музейну експозіцію присвячену Маковіцькому панству, але главно лемківско-русиньскій културї. Так є конціпованый проєкт,“ інформовав Шуркала з тым, же іде о сполочный проєкт Зборова, Кружлёва і Устя Ґорлицького.

Ставебны роботы, котры почали кінцём минувшого року, бы мали быти закінчены в децембрї 2022. Окрем сполоченьской салы, зостаток будовы будуть творити музейны експозіції. До будучности мають в Зборові амбіцію, жебы то быв повноцїнный музей.

„На єден листок буде годен навщівник посмотрити собі наш музей, музей в Кружлёві, як і музей в Устю Ґорлицькім,“ додав Шуркала.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.