3. 10. 2018: Загыбаючы звірята Енді Варголя в Ню Йорку

В найблизшу неділю, 7. жолтня/октобра 2018 р., в Украіньскым Музею в Ню Йорку одбуде ся одкрытя выставы выдатного артисты русиньского походжыня – іконы поп-арту – Енді Варголя. Буде то десят ґрафік з сериі «ЕндІ Варголь: загыбаючы виды звірят», котры походят з 1983 рока.

Важным компонентом вернісажу буде част посвячена молодым рокам артисты з Пітсбурґа, де ховал ся в карпаторусиньскым середовиску, што підкрислят сам музей, а тото же влияло на його еволюцию і дорогу до бытя знаным світовым артистом. Зато і при експозициі зо славном серийом звірят будут презентуваны тіж творы Варголя з молодого періоду творіня, ґу котрым будут приданы деякы приватны артефакты і родинны фотоґрафіі.

Варголь (а може барже його творчіст) был постеріганий як артиста, якій при творіню не мат емоций. Вшытко, што намалювал, мало бы быти так само консумпцийне і комерцийне, не смотрячы на тото, ци видиме його доляровы банкоты, славну зупу, ци буд-што інче. Речена серия з жывином здає ся перечыти тій опініі, бо мала вказувати на тяжкє положыня дакотрых видів звірят і мала звернути увагу світа на іх загыбаючы ґрупы. Прото, кєд тямиме творчіст короля поп-арту лем з баньок поливкы Кампбель, або інчых «комерцийных» творів, скоро мож забыти, же діапазон його творчости был о вельо шырший, ачий сігал далеко-дальше як поп-арт, ци загальні малярство. Артиста прібувал припомнути тіж людям, же не лем они єдны жыют на тым світі.

Критикы кумшту, а і дослідникы творчости Енді Варголя видят іщы більше в сериі з загыбаючыма видами звірят. Варголь, котрого єдном з пасий было малювати портреты славных люди, спосеред котрых вымінити Міка Джаґера, Майкеля Джексона, Мерилін Монров, або самого себе, то лем невеличка част його серіґрафік, схоснувал артистичний переказ портрету, жебы вказати в своіх працах звірята, якы остали героями його творів. Така експозиция, вміщена в портретову серию, мала іщы більший вызвук, вказуючы на проблемы тых видів жывины, котрых онедолга на Земли може не быти.

Выстава «ЕндІ Варголь: загыбаючы виды звірят», котра присвячена єст 90. річници народин артисты (1928-1987), буде вказувана Украіньскым Музейом в Ню Йорку до 17. лютого/фебруара 2019 рока і закінчыт ся дискусийным панельом пн. «Енді Варголь і його карпаторусиньскы корені», в котрым возмут участ знаны русиньскы дослідникы проф. Павел Роберт Маґочій і проф. Елейн Русинко.

Демко ТРОХАНОВСКЫЙ, лем.фм

(Публікуєме в оріґіналї – лемківскім варіантї русиньского языка.)