3. 12. 2021: В роднім селї Жатковіча одкрыли памятну таблу
Припомянули так 135-ту річніцю народжіня першого ґубернатора Підкарпатьской Руси.
Як інформовав Юрій Шиповіч, голова Русиньского културолоґічного клубу, 3-го децембра 2021-го року на стїнї адміністратівной будовы села Голубине, Поляньской сільской рады, была одкрыта памятна табла, котра припоминать, же даный край, з назвов Підкарпатьска Русь, быв у складї Чехословацькой републікы.
Памятна табла была одкрыта в роднім селі Ґриґорія Жатковіча, першого ґубернатора Підкарпатьской Руси, і было так зроблено при нагоді 135-ой рочніцї ёго народжіня, котру сьме собі припомянули 2-го децембра.
Табла припоминать Чехословацькый період
На таблі є по чеськы, словацькы і україньскы текст, в котрім ся пише, же в періоді од 8-го мая 1919-го до 29-го юна 1945-го року была теріторія днешньой Закарпатьской области Україны частьов Чехословацькой републікы і мала назву Підкарпатьска Русь.
„При одкрытю таблы выступив Василь Зваріч, заступник председы Поляньской сільской рады, котрый говорив о файных споминах, котры нашы люде сохраняють о многім добрїм, што ся зробило ‚за Чехів‘ – розвой економікы, освіты і културы,“ інформовав Шиповіч.
Іван Латко, председа Клубу Томаша Ґаріка Масаріка в Ужгородї, котрый вєдно із Обществом приятелїв Підкарпатьской Руси – Бырно были ініціаторами одкрытя памятной таблы, говорив при тій нагодї о тых културных акціях, котры были зроблены у сполупраці з Русиньскым културолоґічным клубом і Обществом Александра Духновіча.
Продовжовали округлым столом
По торжественнім одкрытю памятной таблы в адміністратівній будові одбыв ся округлый стіл, котрый быв присвяченый рочніцї народжіня Жатковіча.
Модератором той події быв доцент Ужгородьсой націоналной універзіты і кандідат історічных наук Михаіл Зан. Участници могли выслухати три реферати. Микола Рішко, краёзнатель і жытель села Голубине, бісїдовав о історії родины Жатковічів в контекстї історії краю і села Голубине кінця ХIХ. і початку ХХ. столїтя.
Павел Худіш із Ужгородьской націоналной універзіты говорив на тему Ґригорій Жатковіч і судьба Підкарпатьской Руси по Другій світовій войнї. Третїй выступ мав кандідат історічных наук і експріматор (ексмер) Ужгорода, котрый выступив з темов Незабытны стрїчі у місті Корвалліцї (США, штат Ореґон) у 1992-ім роцї.
На події были участны і далшы представителї русиньского руху, як председа Народной рады Русинів Закарпатя Євген Жупан, председа Общества Александра Духновіча Юрій Продан, і далшы.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
