3. 12. 2023: Вмер отець Ласло Пушкаш, вызначный малярь, лавреат Премії імени Антонія Годинкы
Як інформує сайт Мукачовской ґрекокатолицькой єпархії, 24-го новембра 2023-го року вмер священик єпархії – отець Ласло Пушкаш.
Отець Пушкаш быв окрім іншого вызначным малярём, педаґоґом, а так само робив у Комсії про беатіфікацію Александра Хіры, Петра Павла Ороса і іншых священомучеників Мукачовской ґрекокатолицькой єпархії. Вмер у віцї 82 років.
Народив ся Ласло Пушкаш 22-го фебруара 1941-го року в родинї ґрекокатолицького священика в Ужгородї. По тім, што у 1974-ім роцї перебрав ся жыти до Мадярьска вєдно з родинов, окрім того, же занимав ся малёванём, став редактором Выдавастелььства вытварных умень в Будапештї, а пізнїше ведучім умелецькой редакції того выдавництва.
Малярь у Мадярьску
Почінаючі 1977-ым роком робив різныма техніками і жанрами в рамках церьковного уменя. В тім часї паралелно з тым, же учів на Римокатолицькій богословскій академії імени Петра Пазманя, все веце зачав занимати ся сакралным уменём, што од 1984-го року стало ёго выключнов умелецьков професіёв.
Ласло Пушкаш зробив казеїновы розписы на стїнах секко про єденадцять церьквей, наприклад і про ґрекокатолицькый храм в Гайдудорозї ці Катедралный собор святого священомученика Йосафата у Торонтї, про ґрекокатолицьку церьков у Шарошпотоцї, а так само зробив дакілько іконостасів.
Од 1990-ых років напроєктовав шістьнадцять мозаічных композіцій, котры і зреалізовав, так само і розписы на стїінах, котры реалізовав вєдно із своёв женов, і котры были обїднаны ґрекокатолицькыма, православныма і римокатолицькыма храмами у Войводинї, Еґерї, Кракові, Казінцбарціцї, Відню і Уйпалотї.
Ґрекокатолицькый священик, історік, педаґоґ
По 1989-ім роцї змінила ся політічна сітуація в бывшім совєтьскім блоку, а то запричінило і великы зміны в жывотї Ласла Пушкаша. У 1993-ім роцї быв рукоположеный на священика Мукачовской ґрекокатолицькой єпархії з метов, жебы помочі знова леґално дїючій Ґрекокатолицькій церькви.
Отець Пушкаш актівно выконовав свою службу, причім много подорожыв меджі Будапештом і Підкарпатём. В тім часї далше занимав ся і творчостёв, а пак і науково-бадательсков а педаґоґічнов роботов.
У Львівскій народній академії умень учів теолоґію сакралного уменя, так само орґанізовав і зачінав выдаваня меджінародного теолоґічного журнала Сопричастя, котрого быв довгы рокы головным редактрором, ходив выступати на многы меджінародны конференції.
Ёго увагу все притїгала історія Мадярьска і середнёй Европы, хрістіанство, окремо церьков, і то Ґрекокатолицька церьков. На тоты темы, глядаючі правду, написав много глубокых, часом провокаційных богословскых і церьковно-історічных статей. Ёго бадательска робота найвеце занимала ся переслїдованьом церькви на Підкарпатю в роках 1949 – 1950.
В тім часї потерпив і ёго отець, ґрекокатолицькый священик, котрого за віроісповіданя одсудили на роботы в ҐУЛАҐ-у. Отець Ласло Пушкаш актівно робив на беатіфікації священиків-мучеників і єпіскопів-мучеників, і як promotor iustitiae (промотор справедливости) взяв актівну участь в канонізачнім процесї блаженого священомученика Теодора Ромжы.
Сам быв автотом біоґрафії нашого блаженого мукачовского єпіскопа Теодора, котра вышла у семох языках. Окрім того вышли далшы книгы, котрых автором быв Ласло Пушкаш.
Оцїнёвана особность
Отця Ласла Пушкаша нераз оцїнли за ёго многорочну творче, бадательске і науково-літературне дїятельство.
У 1980-ім роцї Міністерство културы Мадярьска признало Ласлови Пушкашови нагороду за выдатны умелецькы досягненя, а у 2006-ім роцї Мадярьска конференція єпіскопів му удїлила премію Pro Cultura Christiana. В роцї 2010 презідент Мадярьска нагородив умелця Орденом Мадярьской републікы – Рыцарьскым хрестом за заслугы, а в тім самім роцї Рада Фонду імени Ґабора Бетлена му удїлила Памятну медайлу імени Арона Мартона за намагы на благо мадярьской културы.
У 2011-ім роцї дістав Премію Петра Прокопа за церьковне уменя. Мозаічны фрескы мадярьской каплічкы Communio Sanctorum у базиліцї Божого милосердя в Кракові принесли Пушкашови меджінародне узнаня в области сакралного уменя.
Отець Ласло Пушкаш став так само лавреатом Премії імени Антонія Годинкы за 2021-ый рік, котру му удїлило Вседержавне общество русиньской інтеліґенції імени Антонія Годинкы в Мадярьску.
Вічная память!
Петро МЕДВІДЬ, ЛЕМ.фм, языкова і ґрафічна управа: АРК в СР.
