3. 2. 2023: Мож приголосити ся до Карпатьской писанкы 2023

Музей вызывать писанкарів із Словакії, але і споза граніць, жебы актівно взяли участь на 31-ім річнику той події. Тот рік честным гостьом буде Музей писанок, котрый находить ся в містї Коломыя на Українї. Тот музей є єдиным свого тіпу на світї.

Карпатьска писанка – то традічна і вызначна музейна подія, котра презентує заховаваня културного богатства карпатьского реґіону. Єдночасно є намагов музея выглядати писанкарів і творити простор на творчу конфронтацію, штудіюм традічной културы, розвиток творчества і технічной здатности дїтей, молодежи і дорослых з різных реґіонів Словакії і зо заграніча.

Каждый рік на тій події презентують в музею формов выставы скоро тісяч писанок із дакілько країн Европы.

До конкурзу Карпатьска писанка 2023 можуть залучіти ся авторы писанок без вікового обмеджіня із теріторії Словакії, а так само з іншых держав. Старчіть загнати колекцію своїх писанок, максімално десять фалатків, зробленых будьяков техніков.

Оцїнка конкурзу фаховов журї і святочне передаваня нагород одбуде ся в рамках окдрытя выставы Карпатьска писанка 2023 дня 16-го марца 2023 в концертній салї Вігорлатьского музея. Конкурзны колекції писанок будуть пак аж до 30-го апріля выставлены в Ґалерійній салї Ореста Дубая.

Писанкы можуть авторы до конкурзу загнати до 1-го марца. Заінтересованы найдуть вшыткы потрібны інформації на сайті Вігорлатьского музея в Гуменнім.

Петро МЕДВІДЬ, ЛЕМ.фм. Ґрафічна і языкова коректура: АРК в СР.