3. 3. 2023: Людміла ШАНДАЛОВА: Сумлїня, Мало нам (Поезія)

Людміла Шандалова

 

Сумлїня

Заспало сумлїня

чловек го скрыв

до гущавы старостей

до лозин страху

запхав го, затиснув

до норы нелюбви

глубоко закопав

під глину кламства

до лады непокоя

замкнув колодков

перед носом прибухнув дверї

хырбетом ся обернув

зеркало закрыв фірганґом

не видить

не чує

Што з нами буде завтра?

 

 

Мало нам

Попсули сьме ся

мало нам было

воды

сонця

співу птахів

теплой вечернёй влагы

щавнатой нивы

i ясных звізд

мало нам было

морьской піны

земных плодів

пахоты лук

тиха за скорого рана

мати земля ся образила

бо мало нам было

форкать сопками

заливать слызами

огнём очіщює

крупами бє

трясе ся гнївом

мало нам было

попсули сьме ся

одмінили невдяком