3. 5. 2023: Буковскый вызывать самосправы одсторонити недостаткы в области языковых прав
Уповномоеченый влады Словацькой републікы про народностны меншыны Ласло Буковскый вызвав писмом меншыновы села і міста одсторонити недостаткы в области дотримованя меншыновых языковых прав.
Реаґовав тым на резултаты Справы о хоснованю языків народностных меншын за період років 2021 – 2022. Інформовав о тім офіціалный сайт Уряду уповномоченого влады СР про народностны меншыны у віторок, 2-го мая 2023-го року.
„Зіщены і конкретізованы недостаткы суть векшынов справны делікты, на основі котры може зачати ся справный процес і удїлїня фінанчного штрофу,“ інформовав уряд. Як ся дале пише на сайтї, на основі писемной вызвы мають села і міста інформацію о способі і термінї оправы недостатків загнати до кінця мая, причім уповномоченый їм дав основны інформації о додаваній одборный і методічній помочі при аплікації меншынового языкового закона.
Послідня оцїнка Уряду уповномоченого влады СР про народностны меншыны потвердила довгодобый тренд, подля котрого росне чісло меншыновых сел і міст, котры в максімалній мірї дотримують языковы права.
Тоты інформації выходять із самосправами выповненых анкет, в котрых одповідали на округы вопросів, якы дотуляють ся меншыновых языковых прав. Покля в попереднїм періодї з цїлковой кількости 638 меншыновых сел і міст было без недостатків 58, з чого было 57 мадярьскых і єдно русиньске, у 2022-ім роцї кількость наросла на 114, з того 108 мадярьскых і шість русиньскых.
Піднимать ся і чісло прикладных сел і міст, котры законны повинности і можливости аплікують в максімалній можливій мірї.
Припоминаме, же од 1-го марца того року звекшыло ся чісло меншыновых сел і міст подля нового наряджіня влады. Кедь дотеперь было на Словакії 638 сел і міст, де мож было хосновати меншыновый язык, теперь їх є о 125 веце. Русины мають одтеперь 154 сел і міст, дві з того суть міста – Меджілабірцї і Свідник, дотеперь мали 66, з чого єдно было місто – Меджілабірці.
Петро МЕДВІДЬ, ЛЕМ.фм, языкова і ґрафічна управа: АРК в СР.
