3. 5. 2023: В Кошіцях припомянули собі ліквідацію Ґрекокатолицькой церькви

В недїлю, 30-го апріля, в Кошіцях одбыла ся споминова стрїча при нагодї рочніцї траґічной події – ліквідації Ґрекоатолицькой церькви у бывшій Чехословакії. Вєдно з Кошіцьков єпархійов єй орґанізовала Конфедерація політічных арештантів Словакії і Общество св. Кіріла і Мефодія. Інформовав о тім Пресовый центер Кошыцькой єпархії.

Перед 73-ма роками, 28-го апріля 1950-го року, одбыв ся комуністічныма властями зорґанізованый такзваный Пряшівскый собор, на котрім дакілько ґрекокатолицькых священиків і лаіків выголосило зрушіня Ужгородьской унії і навернутя до Православной церькви.

Втогдышнї власти схосновали резултаты того згромаждіня, дали мімо закон Ґрекокатолицьку церьков, і цїлый маєток перевели до властництва Православной церькви. Нихто з ґрекокатолицькых єпіскопів не перешов на православіє, была то лем мала часть священиків і віруючіх. Єпіскопи были у выконштруованых процесах одсуджены на довгорічный арешт, понад сто священиків з родинами было выселеных до чеського приграніча.

Споминова стрїча залача архієрейсков літурґіёв у Ґрекокатолицькім катедралнім соборі Рождества Пресвятой Богородіцї в Кошіцях, котру одслужыв владыка Кіріл Василь, архієпіскоп – кошіцькый єпарха. Вєдно з ним служыло веце священиків, переважно внуци або правнуци ґенерації переслїдованых священиків із 1950-го року.

Меджі віруючіма были потомкове веце як 70-ох ґрекокатолицькых священиків, котры прияли позваня на тоту стрїчу.

По літурґії участны пішли на Домініканьску площу, де є на бывшій будові єпархіалного уряду од року 2000 наішталована памятна табла переслїдованым священикам і лаікам Ґрекокатольцкой церькви. По пєтнім актї кладжіня вінцїв приговорив ся Петер Сандтнер, представитель Конфедерації політічных арештантів і отець Михал Господарь, председа Общества св. Кіріла і св. Мефодія.

Наслїдно вєдно передали участным потомкам ґрекокатолицькых священиків памятнй діплом і автобіоґрафію владыкы Йоана Гіркы з назвов Під покровом Марії. На кінцю помолили ся панахіду за переслїдованых, котру одслужыв владыка Кіріл.

Петро МЕДВІДЬ, ЛЕМ.фм, языкова і ґрафічна управа: АРК в СР.