30. 10. 2022: Пряшівскый край поведе Мілан Маєрьскый. Председа РОС Мартін Караш буде тыж у крайскім парламентї
Михал Калиняк не выграв над дотеперїшнїм жупаном.
В суботу, 29-го октобра 2022-го року, проходили на Словакії першый раз споєны крайскы і комуналны вольбы. В Пряшівскім самосправнім краю (ПСК), де жыє найвеце Русинів в рамках Словакії, зіставать жупаном Мілан Маєрьскый (KDH, Sme rodina, SaS, Za ľudí).
Найвекшов конкуренціёв му быв Михал Калиняк, родак з Меджілаборець (Hlas – sociálna demokracia, SMER – SD, SNS, SZÖVETSÉG – ALIANCIA). Но хоць му кількость голосів в порівнаню з баданями преференцій пред вольбами наросла, не старчіло то, і по пятьрочнім мандатї буде далшы штири рокы председом ПСК Маєрьскый.
Калиняк бы міг быти віцежупаном
На початку рахованя голосів в суботу вечур куртый час вів Михал Калиняк, но было ясне, же порахованы суть лем малы села і вєдно з выслїдками векшых сел і міст ся буде сітуація мінити.
Наконець Калиняк здобыв 31,39 процента голосів, причім староновый жупан Маєрьскый мав 42,01 процента. Роздїл меджі фаворізованыма кандідатами быв понад 10 процент, причім многы думали, же і кедь выграть Маєрьскый, роздїл буде тїснїшый.
Маєрьскый ся такой вночі подяковав на соціалній сітї голосуючім, же дали „Пряшівскому краю шансу быти досправды гордым Выходом,“ і написав, же собі щіро цїнить каждый єден голос. Жупан бере далшый мандат як „великый обовязок дале хоче намісто бісїдованя безпрестайно робити і приносити резултаты про лїпшый жывот людей в рамках цїлого краю.“ Так само акцентовав, же є притоволеный наповно в тім продовжовати.
Калиняк по півночі зо суботы на недїлю признав прогру, і потвердив, же вже телефоновав з Маєрьскым і поґратуловав му ку перемозї.
Но хоць не быв успішный як кандідат на жупана, здобыв безконкуренчно найвеце голосів із вшыктых кандідатів зо вшыткых окресів на посланцїв ПСК. З чіслом голосів 12 460, котры здобыв за окрес Пряшів а кількостёв посланцїв, котры ся за тоту саму коаліцію дістали до крайского парламенту, і котрым бракує лем трёх людей, жебы мали точну половину заступистельства ПСК, є реалным кандідатом на віцежупана.
Вопросом є, ці Калиняк схоснує свій мандат і посадить ся до крайского парламенту, або верне до Здружіня міст і сел Словакії з тым, же далше буде занимати ся самосправов як фаховець.
Пріматоры в нашых реґіонах
Посмотрили сьме ся і на то, якы резултаты принесли вольбы на позіціях пріматорів міст в нашых реґіонах.
В Меджілабірцях здобыв знова мандат дотеперїшній пріматор Владислав Вышнёвскый (Hlas – sociálna demokracia, SMER – SD), котрый мав аж 70,52 процента голосів. До містьского заступительства там кандідовав і наш молодый актівіста а председа обчаньского здружіня Лабірьскы Русины Александер Грічко (SaS), но не перешов.
Свідник так само продовжує зо старновов пріматорков Марцелов Іванчовов (Hlas – sociálna demokracia, Sme rodina, KDH), котра здобыла 48,55 процента голосів. У Свіднику кандідовав і Мілош Стрончек, котрого знаме як нашого актівісту, председу Окресной орґанізації Русиньской оброды у Свіднику а орґанізатора Русиньского фестівалу. Но здобыв лем 3,86 процента голосів.
Потїшуючім фактом є, же молодый русиньскый актівіста Станїслав Гвозда, котрый кандідовав на містьского посланця, здобыв мандат і быв пятый найуспішнїшый подля чісла голосів.
Бардеёв і далше буде вести як пріматор Боріс Ганущак, котрый є довгы рокы уж як кебы неогрозительным монархом. Пріматором є од 1999-го року і здобыв мандат на далшы штири рокы, кедь му дало голос 47,42 процента людей.
В Бардеёві знова обгаїв мандат містьского посланця і Мілан Ян Піліп (незалежный кандідат), член Выбору про народностны меншыны і етнічны ґрупы, председа Уряду про Словаків жыючіх в загранічу а член презідії Округлого стола Русинів Словакії.
В Снинї є у функції пріматора зміна. Даніела Ґаландова не обгаїла свій мандат, котрый дістала перед штирёма роками. Новым пріматором став Петро Волошин (KDH), котрый здобыв 41,14 процента голосів.
Стара Любовня продовжує з пріматором Любошом Томком (незалежный кандідат), котрый здобыв 73,77 процента голосів.
І в Гуменнім зіставать пріматором Мілош Мерічко (незалежный кандідат), котрому дало голос 50,14 процента людей.
У крайскім парламентї і люде з русиньского руху
Окрем Михала Калиняка, котрый здобыв мандат посланця ПСК, а котрого можеме знати і з русиньского руху, і далшы люди актівны в русиньскых справах здобыли мандаты посланцїв.
За окрес Стара Любовня буде посланцём ПСК Мартін Караш, председа Русиньской оброды на Словеньску, котрый знова обгаїв і мандат посланця містного заступительства в селї Камюнка. За тот самый окрес буде крайскым посланцём актівный наш староста Михал Дідік (незалежный кандідат), котрый тыж обгаїв свій старостовскый мандат в селї Чірч.
За Свідницькый окрес быв выбратый за єдного з трёх посланцїв ПСК того окресу Михал Ільканин (незалежный кандідат), котрый є предностом Окресного уряду у Свіднику, а знати го можеме і як бывшого актора Театру Александра Духновіча в Пряшові.
Петро МЕДВІДЬ, ЛЕМ.фм. Ґрафічна і языкова коректура: АРК в СР. Фото: TASR.
