30. 12. 2021: Любовняньскый град і сканзен навщівило скоро 170 тісяч людей

Рік 2021 оцїнюють в Любовняньскім музею позітівно. Як про аґентуру TASR повів директор Далібор Мікулик, зреалізовали веце проєктів, а і навщіность граду і сканзену го мило несподївала.

„Тот пандемічный період неґатівно засягнув главно турістічный рух, а мы ёго частёв, но і наперек тому до нас завітало майже 170 тісяч навщівників. Покля в іншых памятках зазначіли знижіня навщівности і о 60 процент, у нас было знижіня на уровни приблизно 20 процент,“ повів Мікулик.

Навщівници з Польщі ся іщі не вернули

Затля рекордным быв про Любовняньскый музей 2019-ый рік, коли посмотрити замок і сканзен, в котрім находять ся і деревяны обєкты народной архітектуры з русиньскых сел, пришло 216 тісяч людей.

У 2021-ім роцї сприступнили по реконштрукції палац Любомірьскых, што подля директора помогло навщівности. Но майже 30 процент людей ся до Старой Любовні вертать. „Тоты люди знають, же і кедь прийдуть двараз в роцї, все увідять нову выставку, нове представлїня, музикал, концерты або обновлену часть замку. Велё о нас чути, бо ся у нас велё робить, а і зато ся до нас гостї вертають,“ інформовав директор музея.

Мікулик обернув увагу на то, же іщі все не вернули ся гостї з Польщі, котры творять коло 40 процент навщівників. За ёго словами є причінов і то, же условія про вступ на Словакію не были просты, но додав, же турістічный рух потримали в тім роцї люде із Словакії.

Реалізовали далшы проєкты

У 2021-ім роцї музею подарило ся зреалізовати два проєкты з Міністерства културы Словацькой републікы.

„Здобыли сьме 18 тісяч евр на всокочіня гаварійной части плаща западного бастіону з першой половины 16-го столїтя. Успішны сьме были і в ґрантї про зневыгоднены ґрупы жытелїв, де продовжуєме в успішній анімованій приповдц, перша часть была о тім, як будовав ся град, друга є о ёго жытелях, і теперь продовжуєме історіёв о воєньскім ґарнізонї граду. Єдночасно вдяка Фонду на підпору уменя рештавруєме кахлёвый псевдоренесанчный пец, і выдали сьме третїй том етноґрафічных записників Яна Лазорика, котрый занимать ся звыками і обрядами, а ёго частёв є і ЦД зо записами із 25 сел,“ выраховав актівности Мікулик.

Окрем того ся подарило музею здобыти 850 тісяч евр з ґранту Европского господарьского простору і Норвеґії на обновлїня северовыходной стїны граду.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: FB/Ľubovnianske múzeum.