30. 6. 2022: Стріча з полномічныма воєводів дс. нацийональных і етнічных меншын

В середу, 22. червця/юнія тр., зачала ся дводньова стріча представників Міністерства Внутрішніх Справ і Адміністрациі з особами з поєдных воєвідств, што сут одповідальны за справы нацийональных і етнічных меншын та соспільности, котра хоснує реґіональный язык.

Цілю стрічы было вымінити ся актуальныма інформациями м.ін. в обшыри реализациі задач тыкаючых підтриманя культуровой і языковой достоменности нацийональных і етнічных меншын і соспільности хоснуючой кашебскій язык. Участникы стрічы бесідували і о способах пошырюваня знаня о меншынах, іх языку, істориі ци культурі. Робітникы МВСіА вказали презентациі о меншынах та розповіли о плянуваных механізмах признаваня дотаций на 2023 рік.

В варштатовій части омовили етапы вводжыня в 2021 р. урядового Проґраму соспільной і громадяньской інтеґрациі Ромів в Польщы на рокы 2021-2030. Представник Міністерства Едукациі і Наукы вказал стан реализациі задач фінансувнаых в Проґрамі інтеґрациі з 30. части буджету державы, што є в диспозициі міністра дс. освіты і выхованя.

На стрічы омовили едукацийну ситуацию ромскых школярів та формы діянь, цілю якых є шыроко інформувати векшынове соспільство о ефектах діянь в рамах Проґраму інтеґрациі.

Представникы воєвідств вказали на потребу цикличных стріч, бо дозваляют они выміняти ся досвідчынями, омавляти політику добрых практик і успішні выміняти інформациі.

Департамент Реліґійных Віроісповідань та Нацийональных і Етнічных Меншын репрезентували Анджей Сосновскій, заступця директора Департаменту, Ґжеґож Журавєцкій, Начальник Выділу НіЕМ та др Малґожата Мілевска, радця в ДРВтНіЕМ, одповідальна за вводжыня Проґраму інтеґрациі.

Основом роботы полномічного воєводы є устава з дня 6. січня 2005 р. о нацийональных і етнічных меншынах та о реґіональным языку. До найважшнійшых його задач належыт спілпраца з нацийональныма меншынами та урядом обслугуючым міністра до справ реліґійных віроісповідань та нацийональных і етнічных меншын.

Фoт. www.gov.pl