30. 8. 2018: Одбуде ся 4-ый річник Русиньского фестівалу в Гуменнім

Вігорлатьскый музей в Гуменнім запрошать любителїв фолклору в днях 7-го аж 9-го септембра 2018-го року на 4-ый річник Русиньского фестівалу в Гуменнім. Подія буде проходити в ареалї сканзену Вігорлатьского музею, в просторах Пріватной основной умелецькой школы на Кудловскій уліцї і на намістю коло Містьского културного центра.

Першый фестіваловый день зачне о 16.00 год. кройованым ходом через місто. Інтересностёв тогорічного проґраму буде вернісаж выставкы фотоґрафій богатой діялности і выступлїнь фолклорного ансамблю Хемлон Гуменне і співацькых ґрупы Гачуре і Босорочкы. Вернісаж є напланована на 17.00 год. в просторах умелецькой школы. В просторах школы будуть 8-го септембра уж од ранных годин проходити творчі ділнї, мож буде ся навчіти традічны танцї із области вышнёго Земпліна.

Богатый фестіваловый проґрам почас третёго дня зо зачатком о 10.00 год. обогатить в Православній церькви св. Кіріла і Мефодія торжественна літурґія. Од 13.30 год. буде в ареалї сакнзену проходити културный проґрам під назвов Одказ предків. В рамках проґраму одбуде ся і реґіонална конкурзна переглядка фолклору дорослых із окресів Гуменне, Снина і Меджілабірцї.

Фестіваловый проґрам завершыть ся 9-го септембра зо зачатком о 16.00 год. сполочным концертом домашнїх і загранічных колектівів, ґруп і солістів в проґрамі під назвов Співанков, музиков і танцём на Намістю слободы коло Містьского културного центра. Выступаючі будуть із Словакії, Польщі, Росії і Чеськой републікы. Комплетный проґрам можете найти на плаґатї.

Петро МЕДВІДЯ, жрідло: лем.фм