31. 8. 2022: Протест лемківской соспільности

Неє згоды лемківской соспільности на дальшу ідеолоґічну достоменностьову політику ведену Обєднаньом Лемків, на іх фальшуваня і маніпулюваня історийом.

Написали сьме протест, котрый был посланый до децидентів реализуючых Проґрам Активны Громадяне, взглядом проєкту Обєднаня Лемків пн. «Лемкы то мы» фінансуваного з реченого фонду.

В єдній з части проєкту Обєднаня Лемків хоче провести в стох школах (!) прелекциі про історию, походжыня, достоменніст Лемків. Не треба ся ани додумувати, яку неправду зас буде шырила тота орґанізация – старчыт войти на сайт проєкту lemkowietomy.pl і почытати зрыхтуваны нима інформацийны пакєты.

Шырокє попертя

Лемківска соспільніст та орґанізациі заанґажуваны в діяня, што мают на ціли плекати і розвивати лемківску достоменніст і культуру, не сут обоятны на поміщену гын лож. Што веце – наш протест підперло вельох выдатных науковців – специялистів зо світа в обшыри знаня о Лемках (серед них сут м.ін. історикы, социйолоґы, антрополоґы, політолоґы ци етикы), та ґрупа представників державных урядів з ріжных держав Европы.

Who is who?

Писмо, жебы підперти протест, было послане до ріжных бенефіциєнтів міністерияльных ґрантів презначеных на розвиток і захованя лемківской культуровой достоменности, а то до: Стоваришыня Лемків, Стоваришыня Лемківской Молодежы «Чуга» в Польщы, Ансамблю Пісні і Танця «Лемковина», Товариства для Розвитку Лемківской Культуры в Зындрановій, Лемківского Ансамблю Пісні і Танця «Кычера», Лемківской Едукацийной Загороды в Ґладышові, Товариства Популяризуваня Традиций і Культуры Лемків, Єпархіяльного Осередка Православной Культуры Ельпіс, Клюбу Патріотів Лемковины, Стоваришыня Лемко Тавер, Стоваришыня Промоциі Лемківской Творчости «Серенча» та Фундациі «Стара Дорога».

Наталія МАЛЕЦКА-НОВАК, Демко ТРОХАНОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)