4. 10. 2023: Округлый стіл з нагоды сторочніцї выданя русиньской ґраматікы

Як інформовала аґентура Рутенпрес, 29-го септембра 2023-го року в просторах Заводу про културу войводиньскых Русинів у Новім Садї одбыв ся округлый стіл з нагоды округлого юбілея – сторочніцї выданя Ґраматікы бачваньско-русиньской бісїды (оріґ. Граматика бачваньско-рускей бешеди).

Ґраматіку у 1923-ім роцї в Сримскых Карловцях выдав єден із найвызначнїшых просвітителїв Русинів на нижнїй землї Гавриїл Костельник. Округлый стіл орґанізовало Дружство про русиньскый язык, літературу і културу.

В рамках події одпрезентовало свої рефераты дакілько науковців, котры занимають ся тов варіантов русиньского языка, меджі іншым Михайло Фейса ці Юліан Рамач. Як інформовала аґентура, рефераты, котры были одпрезентованы, будуть надрукованы в 29-ім чіслї научного журналу Studia Ruthenica, котрого выдавателём є Дружство про русиньскый язык, літературу і културу.

Як было повіджено на округлім столї, Костельник усвідомлёвав собі, же якраз народна бісїда має быти тов основов, на котрій має ся штандардізовати і кодіфіковати язык бачваньско-сримскых Руснів. Процес, котрый наштартовав Костельник выданём ґраматікы, быв процесом нелем еманціпації языка, але і самой русиньской комуніты на нижнїй землї.

„Хоць Костельникова ґраматіка у дакотрых областях не была найконзістентнїша, веце як пятьдесять років, в періодї ключовых културных і народных здобытків русиньской комуніты на тій теріторії, была фундаментом, на котрім є кодіфікованый наш язык,“ пише Рутенпрес.

І кедь пізнїше была Костельникова ґраматіка актуіалізована, но головны основы зістали не дотулены дотеперь. На основі ґраматікы Костельника повстав літературный русиньскый язык в тамтешнїй варіантї.

На округлім столї были одпрезентованы і новы публікації. Директор Дружста про културу войводиньскых Русинів Саша Сабадош подаровав часть тіражы Правопису русиньского языка з правописным словником (оріґ. Правопис руского язика з правописним словнїком), котрый выдали, жебы передовшыткым каждый учітель русиньского языка мав свій фалаток.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Рутенпрес.