4. 11. 2023: В Пряшові одбыла ся пресконференція з архієпіскопом-номінантом Йоном

Рукоположеный буде в януарі 2024-го року.

Архієпіскоп-номінант Йона (Йосиф) Максим, котрый быв призначеный за нового пряшівского архієпіскопа і митрополіту, в пятніцю, 3-го новембра 2023-го року, пришов до Пряшова.

В дополuдняйшых годинах стрїтив ся з робітниками Архієпархіалного уряду в Пряшові і Ґрекокатолицькой теолоґічной факулты Пряшівской універзіты. По молитві третёго часу архієпіскоп-номінант попросив в першім рядї о молитвы.

Владыка-номінант так само навщівив і богословску семінарію, де стрїтив з веджінём і богословами.

На пів другу пополудне была напланована пресконференція, котра проходила в просторах Архієпархіалного уряду в Пряшові. Вєдно з новопризначеным митрополітом были на пресконференції участны і кошыцькый єпарха – архієпіскоп Кіріл Василь, а апостольскый адміністратор Пряшівской архієпархії і братіславскый єпарха – владыка Петро Руснак.

Бог є зо мнов, і з цїлов нашов Церьквов

Пресконференцію одкрыв отець Михал Павлишиновіч, говорця Пряшівской ґрекокатолицькой архієпархії. Тот єромонаха Йону привітав, а інформовав о доплудняйшых стрїчах владыкы-номінанта. Пак вже слово дав будучій голові Ґрекокатолицькой церькви на Словакії.

Єромонах Йона знова подяковав Святішому Отцёви Франціскови, котрый го призначів за нового пряшівского архієпіскопа і митрополіту, як і цїлій Церькви. За ёго словами то великый Божый дар, а довіра ку ёго особі, але і до монастыря, в котрім майже 20 послїднїх років пережыв.

Як інформовава владыка-номінант, волю Вселеньского Архієрея му ологосив апостольскый нуніцй на Українї, архієпіскоп Вісвалдас Кулбокас, 22-го септембра того року, коли навщівив монастырь, де єромонах Йона служыть іґуменом.

Архієпіскоп-номінант Йона почас стрїчі з робітниками Архієпархіалного уряду і Ґрекокатолицькой теолоґічной факулты.

Владыка-номінант собі взяв три днї на роздуманя. Як повів, не чекав то. Признав, же дістали ся ку нёму інформації, же бы міг быти кандідатом на єпіскопа, но думав, же покля досправды бы пришло ку такому выменованю, пак аж по роцї 2025, коли му мала кінчіти служба іґумена в Унівскій лаврї. Зато подля властных слов зістав дакус шокованый.

Владкыа-номінант наконець дав згоду на тоту пропозіцію і выбрав собі дату публічного оголошіня того призначіня на 26-го октобра, коли в літурґічнім календарї має праздник великомученик Димитрій.

Нова будуча глава Ґрекокатолицькой церькви на Словакії повів, же по тім, што дав свою згоду, розшырив ся у нїм покій, што є знак, же зробив правилно. „Чую глубоку присутность Божу. Бог є зо мнов, і з цїлов нашов Церьквов,“ повів владыка-номінант.

Обновить ся фунґованя найвысшого орґану

Ку слову дістали ся і архієпіскоп Кіріл а владыка Петро. Кошыцькый єпарха высловив радость, же єромонах Йона прияв свою номінацію.

За ёго словами то добра новина нелем вдяка особі, котра буде новым митрополітом. Добра новина то подля владыкы Кіріла і зато, же ся обновить фунґованя Рада єрархів, значіть найвысшого орґану митрополітной церькви sui iuris (свого права).

Як додав, владыку-номінанта знать десяткы років, іщі коли быв священиком Йосифом, а думать, же ёго призначіня є добрым рїшінём.

Владыка Петро ся тїшыть на сполупрацу. Владыка-номінант є за ёго словами молодым мужом в росквітї своїх сил. Вірить, же до Ґрекокатолицькой церькви на Словакії принесе спірітуаліту монастырьского жывота, „котра є потребна про днешнїй світ. Жывот в монастырю є сполупраца з Божов волёв у молитві і дїяню, і то є потребне про тот світ,“ повів владыка Петро.

Владыка Петро Руснак іщі на дополудняйшій стрїчі повів, же новый владыка є сыном той землї, сыном той Церькви, і вертать ся ку нам.

Рукуположіня буде в януарї

На пресконференції бісїдовало ся і о термінї єпіскопского рукоположіня. Кедьже владыка-номінант є іщі все іґуменом в Унівскій лаврї, не може лишыти монастырь без свого наслїдника.

Як повів, мусить ся як отець постарати о то, жебы одбыли ся вольбы нового іґумена, што бы хотїв стигнути іщі перед новым роком.

Єпіскопске рукоположіня новой главы Ґрекокатолицькой церькви на Словакії одбуде ся 27-го януара 2024-го року в Катедралнім соборї святого Йоана Крестителя в Пряшові. Владыка-номінант прийме хіротонію з рук владыків, котрых собі сам покликав, і котрыма суть ахієпіскоп Кіріл Василь (головный), владыка Петро Руснак, і владыка Венедікт Алексійчук, єпарха чікаґскый Україньской ґрекокатолицькой церькви.

Послїднёго спомянутого владыка-номінант покликав з той причіны, же якраз сучасный владыка Венедікт быв свого часу ёго сполубратом в Унівскій лаврї, і прияв го як іґумен до монастыря.

Як повів єромонах Йона, має уж выбратый свій ерб і своє єпіскопске гесло, но тото хоче оголосити аж пізнїше. Аж до свого рукоположіня буде ходити і до Пряшова, жебы забезпечів вшытко, што треба ку рукоположіню і перевзятю уряду архієпіскопа і митрополіты.

Петро МЕДВІДЬ, ЛЕМ.фм, языкова і ґрафічна управа: АРК в СР.