4. 2. 2024: Фіцо добісїдовав ся з Мадярами на народностнім законї. Уповномоченый говорить о схоснованю єствуючой верзії
Меншыновый закон влада не плановала.
Основов про приготовлїня закона о поставлїню народностных меншын може быти матеріал, котрый выпрацовав у попереднім періодї Уряд уповномоченого влады Словацькой републікы про народностны меншыны.
Про аґентуру TASR то 29-го януара 2024-го року повів новый владный уповномоченый про меншыны Акош Горонь, котрый быв повіреный приправов леґіслатівы. Матеріал, на котрый ся Горонь одкликує, Уряд увпономоченого приготовив іщі під веджіньом Ласла Буковского, котрый быв меншыновым уповномоченым од 2016-го року до октобра минувшого року.
Правдоподобно буде треба новый леґіслатівный замір
Горонь підкреслив, же перед продовжованём приправы пропозіції закона правдоподобно буде треба створити новый леґіслатівный замір.
„Аж по тім кроку можеме почати робити на самім законї, што, самособов, не вылучує схосновати уж існуючу робочу верзію,“ повів уповномоченый з тым, же сам єй поважує за добрый початочный документ.
Єдночасно акцентовав, же цїлём є приготовити пропозіцію, котра буде мати шансу быти схвалена. „О фіналній верзії буду вести переговоры з окремыма резортами, жебы єм представив цїлый матеріал,“ додав Горонь.
Сучасна влада закон не плановала
Ісотіря закона о поставлїню народностных меншын іде аж до періоду влады Петра Пеллеґріні, рр. 2018 – 2020, коли односно той темы прияв узнесїня і обовязав словацьку владу робити на такім законї Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.
Кабінет Іґора Матовіча у своїм Проґрамовім выголошіню влады із 2020-го року замір прияти такый закон мав. Так само тот замір зістав і у Проґрамовім выголошіню влады кабінету Едуарда Геґера з 2021-го року. Приправов быв повіреный Ласло Буковскый, втогдышнїй уповномоченый про меншыны.
Ку приправі закона была створена і експертна робоча ґрупа, в котрій мали представителїв і меншыны, а текст пропозіції закона ся подарило зробити.
Буковскый докінця з готовов пропозіціёв зачав контактовати представителїв народностных меншын, і конзултовав приготовленый текст. Влада Геґера наконець цїлому процесу дала стоп, без офіціалного пояснїня, хоць приятя было уж і в леґіслатівнім планї влады на 2022-ый рік.
Замір прияти такый закон не мала за цїль пак ани урядницька влада Людовіта Одора, котра фунґовала куртый час в роцї 2023.
Сучасный кабінет Роберта Фіца такый замір так само не дав до свого Проґрамового выголошіня влады із октобра 2023-го року. О народностнім законі не было нич написано ани в Плані леґіслатівных задач влады СР на рік 2024, котрый быв публікованый в децембрі минувшого року.
Премєр добісїдовав ся з Мадярами
О змінї погляду премєра Роберта Фіца на тоту проблему інформовали іщі 26-го януара представителї партії Magyar Szövetség – Мадярьска аліанція. Аліанція інформовала о „згодї поглядів“ з премєром і міністерков културы Мартінов Шімковічовов.
„Премєр быв согласный з потребов кодіфікації леґіслатівы, котра дотулять ся народностных меншын, і їй приправов повірив уповномоченого влады про народностны меншыны Акоша Гороня,“ повіла говоркыня партії Еві Палінкаш.
Міністерка културы мала так само представителям мадярьской партії потвердити, же не дійде ани ку злучіню Фонду на підпору културы народностных меншын а Фонду на підпору уменя, што было наплановане на 2024-ый рік, і проти чого поставили ся представителї меншын і умелецькой комуніты.
Партію Magyar Szövetség веде як председа Крістіан Форро (на знимцї), котрый кандідує і в презідентьскых вольбах, якы одбудуть ся в марцї того року.
Петро МЕДВІДЬ, ЛЕМ.фм, языкова і ґрафічна управа: АРК в СР
