4. 3. 2021: Нова «Бесіда»: вкажме, же СМЕ ЛЕМКЫ

В тых днях вышол новый номер часопису Стоваришыня Лемків – «Бесіда», ч. 1 (178) за місяці січен/лютый 2021 р.

В посліднім выданю прочытаме м.ін. статі:

• Севериян Косовскій, Лемківска публицистика темом Дня Русинів в Польщы;
• Севериян Косовскій, Русенко і Маестро – Терочка выконала лемківскій гымн;
• Наталія Малецка-Новак, Результаты плястичного конкурсу для діти;
• Дюра Папуґа, Очуванє власного идентитета Руснацох;
• Петро Трохановскій, Юрий – Кальман Жаткович (1985 – 1920);
• Петро Трохановскій, Іван Горощак (1915 – 1991);
• Петро Трохановскій, Єдиный в русиньскій літературі? (До 280. річниці народжыня Йоана Пастелия).

В часописі находит ся постійна част «Новины, не новины – не лем з Лемковины», де розписаны были найважнійшы подіі з лемківского і загальнорусиньского світа за остатні два місяці. На початку находит ся выімок зо словацкой пресы, тым разом про Будителя Адольфа Добряньского.

Традицийно «Бесіда» богата єст в урывкы давной і сучасной лемківской/русиньской творчости. Находит ся продолжыня творчости Петра Кырпана, выселенця Тылявы (пак прожываючого на Украіні), якій зобрал і описал історию свого села і той части Лемковины в книжці выданій уж по його смерти під назвом «Порваны коралі. Роздумы про село Тылява». В новым номері часопису чытати мож його мысли зачесаны і незачесаны (2). Остаючы в обшыри русиньской творчости, почытати мож дальшу част творчости Михала Ковача під наголовом «Глубокы корені».

В части «Одышли од нас – Попращали мы» находят ся споминовы ноткы на бывшых членів Ансамблю Пісні і Танця «Лемковин»а, покійного Ваня Поручника (1952 – 2020) та покійного Владиміра Гнатишака (1961 – 2020).

Гевсе выданя являт ся принагідным, понеже «Бесіда» пропаґує передсписову русиньску кампанію і заохочує вшыткых Лемків до явного і гордого декляруваня свойой достоменности в надходячым в Польщы Нацийональным Повселюдным Списі 2021. Часопис был в вельох місцях обогаченый кампанійным дізайном, якій спільный єст для вшыткых Русинів, а для Лемків в Польщы емблема єст під гослом «СМЕ ЛЕМКЫ».

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)