4. 3. 2022: Гелена ХОМОВА-ГРІНЁВА: Война (Aктуалный стих)

Гелена Хомова-Грінёва

 

Война

 

Господи, охрани,

Няй утихнуть збранї

І запанує мір

На світї, у домі.

 

Загась оґнї боя,

Сироты погласкай,

Верний дїтём отцїв,

Высуш слызы мамам.

 

Дай розум вождём,

Котры світом рядять,

Няй невинных людей

Не каргають, не розвадять.

 

Кедь нам не поможеш,

Отче на высотї,

Не маме надїї,

На земли мілости.

 

Застав войны світа,

Покорнї просиме,

Няй невиннов кровлёв

Землю не мочіме.

 

Няй молоды сынове

До гробів не лїгають,

Їх старенькым мамам

Сердця не пукають.