4. 4. 2022: «Фонды з Культуром». Інвестиция в Климківці доцінена
В пятницю, 1. квітня/апріля 2022, в Малопольскым Центрі Культуры «Сокіл» в Новым Санчы прошла ґаля «Фонды з Культуром», вчас котрой Вітольд Козловскій Маршалок Малопольщы вручал статуі лавреатам плебісциту «Европейскы Фонды сут в Малопольщы». Три статуі трафили до ґорлицкого повіту, в тым за інвестицию реализувану над климківскым озером.
Вчас пятницьовой ґалі нагороджуваны были найліпшы в оціні мешканців проєкты зреализуваны од 2014 рока з середків Евросоюзу. На сцені сандецкого «Сокола» Вітольд Козловскій вручал символичны статуі оддзеркаляючы доцініня за зреализуваня інвестиций, котры можут інспірувати мешканців і промувати реґіон.
«Малопольща фурт ся змінят. Старчыт выбрати ся в терен, в тоты меншы спільноты, так само обыйстя хыж, але і дорогова, соспільна інфраструктура. То досправды великы зміны, котры прикрашают наш реґіон, і з того треба ся тішыти» – повіл маршалок Вітольд Козловскій. Подякувал тіж за сіганя по унійны середкы і професийонализм в реализациі новаторскых проєктів.
Нова Климківка ся подабат
Памятковы статуі одобрало 30 лавреатів за найліпшы ініциятивы реализуваны вдяка Европейскым Фондам на Сандецкій Земли. То цінны нагороды, бо признаваны за справом голосів оддаваных мешканцями реґіону. Жытелі Малопольщы доцінили м.ін. зміны в інфраструктурі над озером в Климківці. Нагороды, котры трафили до ґорлицкого повіту, одобрал віцестароста Станіслав Кашык.
Жытелі Малопольщы доцінили м.ін. проєкты звязаны з поправом доступности і якости медичных услуг реализуваных шпыталями м.ін. в Новым Санчы ци Креници, достерегли тіж культурны і рекреацийны інвестициі, напр. модернізацию Центра Культуры Сокіл, ревітализацию парку Бєхоньского в Ґорлицях, будову туристичных трас в Креници ци над резервуаром в Климківці.
«Климківка по так спектакулярній метаморфозі може сміло конкурувати з найвекшыма малопольскыма резервуарами. Тота інвестиция є приміром доброй спілпрацы самоурядів» – ствердил віцестароста Станіслав Кашык. В ефекті робіт зробили біциґльовый пут долгости близко 4,4 км, 18 перепустів, 3 лавкы, охоронны барєры та малу туристичну інфраструктуру з одпочынковыма зонами з задашыньом, столами, лавками, стояками на роверы.
Дві дальшы інвестициі з ґорлицкой землі доцінены в плебісциті то реализация двох проєктів в обшыри едукациі проведеных Центром Професийных Компетенций.
Европейскы Фонды в Малопольщы
Окремо оцінене было місто Ґорлиці. Бургомайстер Рафал Кукля одобрал дві статуі за зреализуваны при участи еврофондів інвеститиі – однову містного парку та проєкт пн. «Розбудова систему еколоґічного транспорту способом на менше занечыщыня повітря і высшый комфорт подорожуваня в функцийональній обшыри міста Ґорлиці».
В послідніх роках Европейскы Фонды были єдным з головных моторів засиляючых малопольску господарку. Актуальні кінченых є веце як 4 тис. проєктів, котрых вартіст дофінансуваня ЕУ сігат 12,4 млд зл.
Голосуваня зорґанізуване Маршалківскым Урядом на осін минулого рока мало вказати найліпшы, подля мешканців, інвестициі в даным реґіоні зреализуваны од 2014 рока. Жытелі Малопольщы выберали своіх фаворитів в поєдных повітах.
Наталія МАЛЕЦКА-НОВАК, ЛЕМ.фм.
(Публікуєме в оріґіналї – лемківскім варіантї русиньского языка.)
