4. 4. 2023: В Коцурї змагали ся з русиньского языка

Як інформує аґентура Рутенпрес, в просторах Основной школы Братство єдинство в Коцурї (Сербія) в суботу, 1-го апріля 2023-го року, одбыло ся 13-те Меджіокружне змаганя з русиньского языка і языковой културы.

Подїя одбыла ся в рамках 260-ой рочніцї населёваня Русинів до Коцура, 110-ой рочніцї першого театралного представлїня в Коцурї, і 110-ой рочніцї од народжіня проф. Гавриїла Г. Надя.

На змаганю брали участь школярї основных школ од пятой по восьму класу, де є русиньскый язык навчалным языком або де є русиньскый язык выберовый предмет з елементами народной културы.

Свої знаня вказало 51 школярїв, котры пришли з Руського Керестура, Коцура, Дюрдёва, Бачской Тополї, Нового Орахова, Нового Саду, Сримской Каменіцї, Петроварадина, Вербасу, Кулы, Бачінцїв-Шиду і Шиду. Як конштатує аґентура Рутенпрес, змаганя было успішне, о чім свідчіть факт, же із 51 школярів аж 35 скінчіло на першых трёх місцях.

На цїлорепублікове змаганя, котре про школярів семой і восьмой класы одбуде ся 27-го мая так само в Коцурї, поступило 22 школярів, котры мають навчалный язык русиньскый, і 15 школярїв, котры русиньскый язык учать ся як выберовый предмет.

При удїлёваню оцїнїнь успішным участникам была участна і председателька Оддїлїня про освіту Націоналного совіту Русинів Олена Папуґа. Змаганя орґанізовало Міністерство освіты, наукы і технолоґічного розвитку Републікы Сербії, Дружство про русиньскый язык і літературу а Основна школа Братство єдинство в Коцурї.

Петро МЕДВІДЬ, ЛЕМ. фм, языкова і ґрафічна управа: АРК в СР,

жрідло фотоґрафії: Рутенпрес