4. 4. 2023: Закарпатьска область і Пряшівскый край хотять інтензівнїшу сполупрацу
Резултатом їднаня буде і офіціална декларація партнерства в рамках Договору о сполупраці.
Послїднїй марцовый тыждень 2023-го року проходило білатерлане їднаня меджі Пряшівскым самосправным краём (ПСК) і Закарпатьсков областёв Україны.
Підпредседове ПСК Штефан Бієляк і Йозеф Канущак стрїтили ся з главов Закарпатьской областной рады Володиміром Чубірком, котрый подяковав жытелям Пряшівского краю за гуманітарну поміч.
Як інформовала Даша Єленёва, говоркыня пряшівской жупы, Пряшівскый самосправный край і Закарпатьска областна рада в Ужгородї хотять зінтензівнити сполупрацу в словацько-україньскім пригранічу, і рихтовати конкретны проєкты заміряны на повойнову обнову і розвиток теріторій. Стрїча одбыла ся в просторах Уряду ПСК.
Сполупрацу позначів конфлікт
Довгорічне партнерство меджі Пряшівскым самосправным краём і Закарпатьсков областёв Україны од минувшого року позначів войновый конфлікт. Вдяка войнї взаємны контакты даякый час были концентрованы лем на гуманітарну поміч.
Но марцова навщіва представителї в Закарпатьской области вказує веце на стратеґічну роль сполупраці з выходом Словакії, што може быти вызначне „в процесї европской інтеґрації Україны, приходї інвестіцій, але і всесторонного розвитку приграніча,“ інвформовала Єленьова.
„Україна прямує до Европской унії, і каждый член вступовав до того союзу з плусами, но і мінусами. Зато мы бы хотїли перевзяти скушености з Пряшівского краю, жебы сьме відїли, якы зміны сьте на тій пути реалізовали,“ повів председа Закарпатьской областной рады Володимір Чубірко.
„Єдночасно желаме собі, жебы нашы реґіоны іщі веце товаришыли у вшыткых областях як є освіта, здравотництво ці соціалны службы. Треба нам поправити драгы, інфраштруктуру, і злїпшыти жывот в пригранічных реґіонах, котры мають сполочны проблемы,“ продовжовав Чубірко.
За ёго словами на рїшіня тых проблем служать різны проґрамы черезгранічной спплупраці, в котрых суть грошы, якы хоче Закарпатьска область дати людям в різных областях. „Сполїгаме в тых намагах на підпору Пряшівского краю, котру видиме інтезівно уж довгы рокы,“ доповнив глава Закарпатьской областной рады.
Хотять свторити юрідічный субєкт
На стрїчі ся бісїдовало о можливостях кооперації і капчаня інштітуцій з приграніча, як і о черьпаню европскых фінанцій з проґраму Interreg NEXT. Так само діскутовало ся о приправі сполочных проєктів, передовшыткым на обнову лоґістікы і інфраштруктуры, гранічного перепоїня на Закарпатьску область, включно будованя біціґлёвых стежок ці розвитку турістічного руху.
„Пряшівскый край є найблизшым партнером Україны, в тім припадї Закарпатьской области, і сусїды мають собі помагати. Сьме гранічным реґіоном в рамках Европской унії. Покля Унія буде хотїти прямовати велику інтезівну поміч до Закарпатьской области, буде хосновати і пригранічны реґіоны, котры знають омного інтензівніше і адреснїше помочі, хосновати уж провірены скушености і полегшати ток інвестіцій про Україну. В тім процесї можеме быти на помочі і быти барз хосенны, а єднако можеме помочі розвитку нашых теріторій,“ повів підпредседа ПСК Штефан Бієляк.
Додав, же тота сполупраца буде повнити ся в шыршім контекстї. „На столї є меджівладна ініціатіва Словакії і Україны, конкретно створїня нового юрідічного субєкту – Европского зґрупованя теріторіалной сполупраці, котре бы было інштрументом про легше черьпаня еврофондів без непотребной адміністратівы і бюрокрації.“
Можливу сполупрацу представителї сусїднїх реґіонів видять і в далшых ключовых областях, якыма суть охрана здоровля і жывотного оточіня, соціалны службы, регабілітація, освіта і розвиток бізнісовых контактів.
На словацькім боці і далше є актуална поміч біженцям, як і гуманітарна поміч. „Хочу подяковати ся за кажду форму помочі із Словакії і Пряшівского краю, котра іде на Україну, або будьякым способом помагать полегшати сітуацію нашых жытелїв. Нашым односинам хочеме дати новый імплуз, залучіти до той сполупраці далшых людей із сел, реґіону, бізнісменів і зробити вшытко, жебы наша сполупраца была прикладом, жебы была сінхронна і про обидва черезгранічны реґіону хосенна,“ повів Володимір Чубірко.
Резултатом білатералного їднаня ПСК і Закарпатьской областной рады буде і офіціална декларація партнерства в рамках Договору о сполупраці, котрый бы обидві стороны мали підписати в найблизшых місяцях.
Петро МЕДВІДЬ, ЛЕМ. фм, языкова і ґрафічна управа: АРК в СР.
