4. 8. 2022: Кандідовати на посаду пряшівского жупана буде і Русин з Меджілаборець Михал Калиняк

В минулости быв і председом МО РОС в Пряшові.

На посаду председы Пряшівского самосправного краю (ПСК) буде кандідовати сучасный централный директор Канцеларії Здружіня міст і сел Словакії (Združenie miest a obcí Slovenska), родак з Меджілаборець, Михал Калиняк.

Кандідатуру Калиняк потвердив про аґнетуру TASR в середу, 3-го авґуста 2022-го року. Вольбы до містной і крайской самосправы будуть тот рік першый раз споєны, і председа Народной рады Словацькой републікы їх выголосив на суботу, 29-го октобра 2022-го року.

Обчаньскый кандідат

Як Михал Калиняк інформовав аґентуру TASR, кандідовати в осїннїх вольбах буде як обчаньскый кандідат, значіть не буде кандідатом політічной партії. Єдночасно усвідомлює собі важность штонайшыршой підпоры свого проґраму про ёго ефектівну імплементацію.

„Зато я порихтованый стрїчати ся з політічныма партіями, котры інтересовали ся о мою припадну кандідатуру, жебы єм їм представив тезы свого проґраму,“ повів. Політічны партії можуть підпорити го і як гражданьского кандідата.

У своїй візії видить спектрум проблем найлюднатїшого краю в Словацькій републіцї, при їх направлїню хоче схосновати і скушености із 20-лїтнёго дїяня в области самосправ. „На многы проблемы мож схосновати рїшіня, котры не суть дорогы, а ани залежны од еврофондів як єдиной спасы. Знам, же ся то дасть, і знам як на то,“ деклароє.

Схосновати хоче і детеперїшню роботу в штруктурах Здружіня міст і сел Словакії, о то веце, же централну орґанізацію містной самосправы спринимать як важного партнера і при реґіоналнім розвитку.

„Высшый теріторіалный цїлок мусить быти великый брат міст і сел, то алфа і омеґа. Зато є моёв візіёв, жебы єм не сполупрацовав лем з крайскыма посланцями, але і реґіоналныма здружінями Здружіня міст і сел Словакії. В рамках робочого діару бы зато были і выїзды на засїданя тых реґіоналных здружінь,“ повів на марґо своёй представы о веджіню краю.

Тїснїше перепоїня меджі містнов і крайсков самосправов бере Михал Калиняк за важне на цїлодержавній уровни.

Михал Калиняк

Кандідат на пряшівского жупана Михал Калиняк походить із Меджілаборець. На Філозофічній факултї Пряшівской універзіты в Пряшові штудовав комбінацію політолоґія – україньскый язык і література. Тоты штудії закінчів у 2004-ім роцї, о рік пізнїше на тій самій універзітї обгаїв ріґорозну роботу. На Пряшівскій універзітї быв пізнїше інтерным докторандом, занимав ся теоріёв політікы. Докторьску роботу наконець з того фаху обгаїв на Філозофічній факултї Універзіты Павла Йозефа Шафарика в Кошіцях.

Калиняк є знамый як осдборник на самосправу і представитель Здружіня міст і сел Словакії. Реґуларно го мож відїти в медіах. Быв і говорцём пряшівской а петыржалской радніцї.

В минулости быв і у практічній політіцї. Быв містьскым посланцём в Пряшові за партію Smer в роках 2012 аж 2016, де жыє, перед тым в Меджілабірцях, одкыль походить, быв у роках 2002 аж 2006 містьскым посланцём за SDĽ (Партія демократінчой лївіцї).

Быв і говорцём Міністерства школства, наукы, баданя і шпорту Словацькой републікы, так само говорцём підпредседы влады про сполочность знань, европскы справы, людьскы права і меншыны. Дїяв як член веце експертных ґруп.

Актівный быв і у русиньскім русї. Єден час быв докінця у функції председы Містной орґанізації Русиньской оброды на Словеньску в Пряшові.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.