4. 8. 2023: Юрко ХАРИТУН: Хто нам поможе?, 2021 рік, Маяк, Не згадую (Стишкы)

Юрко Харитун

ХТО НАМ ПОМОЖЕ?

Під горов Арарат

загыбель, потопа, страх

але на кораблї Ное стоїть

і захранить світ

А теперь ковід

Хто нас захранить

хто поможе нам?

Поміч єдина

од Пана Бога і ёго сына

Злату коруну на голові не мав

Тернёвый вінець носив

За нас терпів

Під ёго хрестом молю ся теперь

Яка потїха коли чую

Хрістос воскрес!

 

 

2021 РІК

Я Русин быв, єм і буду

Послухай слова

будителя Духновіча

Кілько нас буде такых

Одповідь ясна

Хто собі напише

народность русиньска

і такый материньскый язык

Богатство не глядай

по горах, по зомклях, по дїрах

Нихто ёго там не закопав

Лем очі отваряй

напинай уха

материньскы слова послухай

Там істо найдеш богатство,

яке ани ґроф Монте Крісто не мав

 

 

МАЯК

Выше Снины

Полонины

А над гатёв Ґаздорань

Ту не можеш заблудити

Бескід буде маяком

На поріг тебе заведе

через хотарь пішником

Потїшыть тебе

коли учуєш:

Хрістос родив ся

Славіте єго!

 

 

НЕ ЗГАДУЮ

Є велё хвороб на світї

Є велё лїків на них

Про мене были

          мамины рукы

          і усмів її

Збігло і выкіпіло лїто

як молоко на пецу

Добігнути рокы не можу

Помалым кроком селом

не перейду

А скакати

          не дарить ся менї

Лїпше коли

не згадую їх

 

(З приправлёваной книжкы автора – Мої соловї.)