5. 1. 2024: Уповномоченый про меншыны высловив незгоду із злучінём меншынового фонду

Як сьме вже скорїше інформовали, словацька влада в децембрї пубкіковала План леґіслатівных задач влады СР на рік 2024, в котрім є на місяць юн напланована Пропозіція закона о Фондї на підпору културы, котрой ґестором має быти Міністерство културыСР.

Приятём такого закона бы ся зрушыли два існуючі фонды – Фонд на підпору уменя і Фонд на підпору културы народностных меншын, а зробив бы ся єден новый – Фонд на підпору културы.

Свою незгоду із зрушінём меншынового фонду в четверь, 4-го януара 2024-го року, выразив і новый уповномоченый влады Словацькой републікы про народностны меншыны Акош Горонь. Інформацію односно своёй позіції ку рушіню окремого меншынового фонду дав на офіціалный сайт уповномоченого на соціалній сітї.

Уповномоченый написав міністерцї

„Посеред народностных меншын выкликала неволю пропозіція Міністерства културы СР о злучіню фондів, што бы значіло фактічне заникнутя Фонду на підпору културы народностных меншын. Тота пропозіція є о то векшым несподіванём, же подля свого проґрамового выголошіня хоче влада надвязати на способы і орґанізованя підпоры розвитку народностных меншын, котры были практічно провірены в періодї владнутя в роках 2016 – 2020, коли быв фонд основаный,“ написав уповномоченый.

„В остатнїх днях єм вже вецераз высловив свою незгоду з пропозіціёв і потвердив єм свій інтерес залучіти ся до леґіслатівного процесу. Вчера (3-го януара, позн. ред.) звернув єм ся писмом до міністеркы културы, пані Шімковічовой, в котрім єм выразив страхы з реорґанізації дотеперішнїх верейноправных фондів, і пожадав єм о преформулованя задачі в леґіслатівнім планї влады в згодї з Проґрамовым выголошінём влады,“ написав далше Горонь з тым, же пожадав і о стрїчу, на котрій бы собі з міністерков пояснили свої становиска.

Апелує на партіціпацію меншын

Уповномоченый Горонь так само спомянув, же буде апеловати, жебы уж міністерством зряджена робоча ґрупа, в котрій суть участны і представителї народностных меншын, была залучена до приправы новелізації.

„Думам, же без конзултації з народностныма меншынами не може быти приправлена повноцїнна пропозіція. Як уповномоченый влады СР про народностны меншыны буду при удїлёваню дотацій тырвати на захованю партіціпатівных вырїшуючіх процесах,“ закінчів Горонь.

Петро МЕДВІДЬ, ЛЕМ.фм, языкова і ґрафічна управа: АРК в СР.