5. 10. 2022: В Кружлёві припомянули собі 200-рочніцю храму

Недїля, 2-го октобра была в селї Кружлёв, Бардеёвского окресу, завершінём святковань 200-рочніцї Ґрекокатолицькой цеьркви Покровы Пресвятой Богородіцї. Інформацію приніс про Інформачный центер Пряшівской архієпархії Станіслав Буйда мол.

Святкованя были споєны з посвячінём храму, котрый перешов реконштрукціёв. Посвячіня выслужыв владыка Петро Руснак, апостольскый адміністратор sede vacante Пряшівской ґрекокатолицькой архієпархії, братїславскый єпарха.

Одпуст на праздник Покровы

Недїльне торжество опередив богатый духовный проґрам, котрый почав уж в четверь. В недїлю проходив одпуст при нагодї праздника Покровы Пресвятой Богородіцї, котрому є присвяченый храм в Кружлёві збудованый у 1822-ім роцї.

Владыку привітав староста села Йосиф Кмец, котрый быв на торжественній події участный з далшыма представителями самосправы. Участь взяв і Мілан Маєрьскый, председа Пряшівского самосправного краю.

Апостольскый адміністратор посвятив інтерьєр храму, як і новый кивот в ґрецьклім штілї. Пак слїдовала Божа літурґія, котру владыка одправляв вєдно із домашнїма священиками, священиками з деканату і шыршой околіцї.

На кінцю владыка Петро удїлив оцїнїня людям, котры помогли ку тому, жебы храм, котрый святкує 200 років, зреконштруовав ся.

При обнові поміг і ПСК

В Кружлёві перед веце як 200 роками стояла деревяна церьков, котра была присвячена святому Николаёви Чудотворцёви. Стояв у ареалї днешнёй фарьской загороды. По тім, што выгорів, Кружлёвчане збудовали муровану церьков і присвятили єй Покровы Пресвятой Богородіцї.

Храм перешов веце реконштрукціями. Послїднї реконштрукції проходили в роках 2021 і 2022. Были реновованы дзвоны, робила ся цїла стрїха. Прибудовала ся сакрістія, обновила ся фасада і цокель, вымалёвав ся інтерьєр. Реноваціёв перешли і світла в храмі, роботы проходили і в околіцї церькви.

Храм Покровы Пресвятой Богородіцї в Кружлёві быв зреновованый вдяка фінанчній підпорї з розрахунку Пряшівского самосправного краю, котрый на то выдїлив понад 65 тісяч евр, як і вдяка людям, котры довєдна пожертвовали 102 тісяч евр на тот ціль.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Фото: Марош Костик.