5. 11. 2019: Юбілей чертіжняньской церькви
• Погляд на чертіжняньску ґрекокатолицьку церьков, яка ся дістала на обалку найновшого чісла Артоса.
• Чашу і діскос жертвовав до чертіжняньской церькви русиньскый будитель Адолф Добряньскый, котрый є похованый на цінтерї за тов церьквов.
Каждый, хто прийде до села Чертіжне, у Меджілабірьскім окресї на Словакії, такой увидить на правій сторонї на бережку прекрасну церьков із 1929 року. В лїтї того року минуло 90 років од єй збудованя.
Зачатком 20. стороча была в Чертіжнім стара церьков з 1709 року. Зато, же была мала, ґрекокатолицькы віруючі зачали в 1926 роцї, вєдно із своїм священиком Ірінеём Ханатом, будовати нову церьков. Докінчена была в 1929 р. а в тім самім роцї 13. юна была на свято Вознесенія Господа нашого Ісуса Хріста і посвячена владыком Павлом Ґойдічом.
Церьков є збудована в сецеснім штілї. Коло бароковой турнї суть дві меншы вежы збудованы подля руськой ренесанції. Церьков мать шырину коло 17 метрів а довжыну выше 31 метрів. Высота главной турнї є 32 метрів. В церькви є красный іконостас із 18 стороча, котрый быв перенесеный зо старой церькви Головный престол є з 1947 року.
Подобна церьков, як в Чертіжнім, є в Новім Рускові у канадьскім Уніонвіллі...
О. Душан ХАПЧАК, здрой: Артос ч. 4/2019, с. 4-5.
