5. 2. 2023: Братїславска архідієцеза фінанчно помогла Пряшівскій архієпархії по землетрясїню

Як інформовала Пресова канцеларія Конференції єпіскопів Словакії (TK KBS), в рамках традічной Святомартіньской добродительской збіркы, котра шторік орґанізує ся з нагоды покровителя Братїславской архідієцезы, вызберало ся у 2023-ім році рекордных 185 518 евр.

За словамми братїславского римокатолицького архієпіскопа митрополіты Станіслава Зволеньского, архідієцеза вырїшыла підпорити з тых грошей тых, котрых постигло в минувшім роцї землетрясїня на выходній Словакії.

Фінанції Братїславска архідієцеза роздїлила точно на половину, з чого єдна іде про Кошіцьку римокатолицьку архідієцезу, друга про Пряшівску ґрекокатолицьку архієпархію. Грошы підуть передовшыткым на оправы римокатолицькых і ґрекокатолицькых храмів у селах Янковцї, Нижня Сітніця, Корункова, Сопківцї і Пакостів.

Несподїваня про нового митрополіту

Братїславскый архієпіскоп митрополіта передав фінанчну поміч по землетрясіню сімболічнов грамотов кошіцькому архієпіскопови митрополітови Бернардови Боберови, і пряшівскому архієпіскопови митрополітови Йонови Максимови.

„В суботу, 3-го фебруара 2024-го року, по торжестві в Пряшові мі архієпіскоп Станіслав Зволеньскый приготовив миле несподїваня, кедь ня покликав до другой містности і передав мі грамоту, на котрій была сума з їх Святомартіньской збіркы,“ повів Высокопреосвященый Йона про TK KBS.

Пряшівскый архієпіскоп митрополіта так само припомянув слова з Біблії: „Радуйте ся з тыма, што ся радують, а плачте з тыма, што плачуть.“

„Я особно барз радый, же духовенство і віруючі Братїславской архідієцезы зрозуміли тото слово і повірили ёму. В рамках Святомартіньской збіркы вызберали чудесну суму на поміч нашым парохіям і храмам, котры постигло землетрясїня,“ повів владыка з тым, же многы люде стратили стрїху над головов і в їх обыстях не мож жыти.

„Вдяка тым вашым дарам будуть мочі оправити ся найвеце пошкоджены храмы, а не зістане бремено лем на плечах тых, котры самы пришли о обыстя,“ повів владыка Йона.

Землетрясїня із октобра

На выходї Словакії было землетрясїня 9-го октобра 2023-го року з маґнітудов 4,9 і епіцентром в катастрї села Дяпалівцї. Запричінило матеріалны шкоды головно на родинных домах в дакілько селах в окресах Гуменне і Воронів над Топлёв, но пошкоджены были і храмы.

В епіцентрі было чути іщі 32 далшых дозвуків землетрясіня аж до 7-го януара того року, што запричінило далшы шкоды на будовах.

Братїславска архідієцеза робить Святомартіньску добродительску збірку каждый рік, причім перша орґанізовала ся у 2009-ім роцї.

Петро МЕДВІДЬ, ЛЕМ.фм, языкова і ґрафічна управа: АРК в СР.