5. 3. 2022: Із словацькой єпархії в Торонтї став екзархат під русиньсков метрополіёв

Як інформовав портал Vatican News, Папа римскый Франціск у четверь, 3-го марца 2022-го року, схвалив зміну Ґрекокатолицькой єпархії св. Кіріла і Мефодїя про Словаків у Канадї із центром в Торонтї, на екзархат.

Юрідічно вже канадьска єпархія не буде належати під Ґрекокатолицьку метрополітну церьков на Словакії, але перешла під русиньску метрополію в Піттсбурґу в Споєных штатах Америкы.

Папа єдночасно выменовав за апостольского адміністратора sede vacante et ad nutum Sanctae Sedis (на порожній столець до одкликаня Святішым престолом) Екзархату св. Кіріла і Мефодїя владыку Курта Ріхарда Бурнетта, єпіскопа з Пассаік в США.

Бывша єпархія была зряджена у 1980-ім році Папом римскым Йоаном Павлом ІІ. Першым єпархом став владыка Михал Руснак, родак із земпліньского села Поздишовцї. Од 2000-го року вів єпархію владыка Джон Пазак, наперед як єпарха, пак як апостольскый адміністратор sede vacante. У 2018-ім роцї выменовав Папа Франціск за нового єпарху далшого родака із Словакії владыку Маріяна Андрія Пацака, котрый ся функції хопив 15-го септембра. Єпіскоп Пацак зрік ся свого уряду в октобрї 2020-го року.

Якраз од того часу вів як апостольскый адміністратор єпархію владыка Курт Ріхард Бурнетте, єпіскоп із Пассаік, котрого єпархія належыть під русиньску Піттсбурґску метрополітну церьков. Теріторія екзархату є згодна з теріторіёв Канады. Моментално має штири парохії, пять священиків і нецїлых 4000 віруючіх.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.